ଭୁବନେଶ୍ୱର: ଏବେ ରାଜ୍ୟର ସବୁଠୁ ବଡ ଚର୍ଚ୍ଚାର ବିଷୟ ପାଲଟିଛି ଲେଡି ବ୍ଲାକମେଲର ଅର୍ଚ୍ଚନା ନାଗ । ବ୍ଲାକମେଲ ହସୀନାକୁ ଏବେ ୭ ଦିନିଆ ରିମାଣ୍ଡରେ ନେଇଛି ଇଡି । ପ୍ରଶ୍ନବାଣରେ ଅର୍ଚ୍ଚନାକୁ ଘାଇଲା କରିବା ପାଇଁ ଚଳାଇଛି ଚେଷ୍ଟା । ତେବେ ଏହା ମଧ୍ୟରେ ଖଣ୍ଡଗିରି ପୋଲିସ ଅର୍ଚ୍ଚନାର ସମସ୍ତ ତଥ୍ୟ ଇଡିକୁ ହସ୍ତାନ୍ତର କରିଛି । ଜବତ କରିଥିବା ଜିନିଷର ଲିଷ୍ଟ ସହିତ ଅନ୍ୟାନ୍ୟ ତଥ୍ୟ ଇଡିକୁ ହସ୍ତାନ୍ତର କରିଛି ପୋଲିସ ।
ଇଡି ଅର୍ଚ୍ଚନା ନାଗ ଗିରଫ ସମ୍ପର୍କିତ ସମସ୍ତ ତଥ୍ୟ ହସ୍ତାନ୍ତର ପାଇଁ କୋର୍ଟରେ ପିଟିସନ ଦାଏର କରିଥିଲେ । ଏହାପରେ କୋର୍ଟଙ୍କ ନିର୍ଦ୍ଦେଶକ୍ରମେ ଖଣ୍ଡଗିରି ପୋଲିସ ଅର୍ଚ୍ଚନା ଘରୁ ସିଜ କରିଥିବା ସମସ୍ତ ଜିନିଷର ଲିଷ୍ଟ ଏବଂ ସମସ୍ତ ତଥ୍ୟ ଇଡି ହାତରେ ଦେଇଛି । ଅର୍ଚ୍ଚନାର ସତ୍ୟବିହାର ସ୍ଥିତ ଘରୁ ସିଜ୍ ହୋଇଥିବା ସମସ୍ତ ଜିନିଷର ଏକ ଲିଷ୍ଟ ଏବେ ଇଡି ହାତରେ ଲାଗିଛି । ଏହା ସହିତ ମାମଲା ସମ୍ପର୍କିତ ସମସ୍ତ ତଥ୍ୟ ମଧ୍ୟ ଇଡି ପାଇସାରିଛି । ଏଣିକି ଇଡି ପାଇଁ ମାମଲାର ଖୋଳତାଡ କରିବା ଆହୁରି ସହଜ ହୋଇ ପାରିବ । ଏବେ ଦେଖିବାକୁ ବାକି ରହିଲା ଆଗକୁ ଘଟଣା କେଉଁ ମୋଡ ନେଉଛି ।
