ବନ୍ଧୁକ…ଶବ୍ଦ ଶୁଣି ଚୋର ଚମ୍ପଟ୍

ଭୁବନେଶ୍ୱର: ପୁଲିସକୁ ଚକ୍‌ମା ଦେଇ ଚୋରମାନେ ଖସିଯିବାର ଅନେକ ନଜିର ରହିିଛି । ହେଲେ ଜଣେ ଘର ମାଲିକ ଚୋରକୁ ଚକ୍‌ମା ଦେବା ଘଟଣା ରାଜଧାନୀରେ ଚର୍ଚ୍ଚାର ବିଷୟ ପାଲଟିଛି । ଘର ଭିତରେ ପଶି ଚୋର ଗୋଟିଏ ରୁମ୍‌ର କବାଟ ବନ୍ଦ କରି ଅନ୍ୟ ଏକ ରୁମ୍‌ରୁ ଚୋରି କରୁଥିଲେ । ଘର ମାଲିକ ଜାଣିବା ପରେ ବଡ଼ ପାଟିରେ ମୋ ବନ୍ଧୁକ ଆଣ ଦେଖିନେବି କହିବା ଫଳରେ ଚୋର କିଛି ବୁଦ୍ଧି ବାଟ ନପାଇ ଭୟରେ ଚମ୍ପଟ ମାରିଥିଲା । ମାଲିକଙ୍କ ଉପସ୍ଥିତ ବୁଦ୍ଧିପାଇଁ ଚୋରି ଉଦ୍ୟମ ପଣ୍ଡ ହୋଇଯାଇଛି । ଏପରି କୌତୁହଳ ଘଟଣା ସହିଦନଗର ଥାନା ଅନ୍ତର୍ଗତ ଭିଏସ୍‌ଏସ୍ ନଗର ଅଞ୍ଚଳରେ ଘଟିବା ସହ ଚୋର ଯିବା ଆସିବା ଦୃଶ୍ୟ ସିସିଟିଭିରେ କଏଦ ହୋଇଛି । ସୂଚନା ମୂତାବକ ବୁଧବାର ରାତିରେ ଭିଏସ୍‌ଏସ୍ ନଗର ଅଞ୍ଚଳରେ ରହୁଥିବା ପ୍ରବେଶ କୁମାର ସାହୁଙ୍କ ଘର ଝରକା କାଟି ବିଳମ୍ବିତ ରାତିରେ ଚୋର ଘରେ ପଶିଥିଲେ । ଗୋଟିଏ ରୁମ୍‌ର ବାହାର ପଟୁ କବାଟ ବନ୍ଦ କରି ଅନ୍ୟ ଏକ ରୁମ୍‌ରେ ଚୋରି କରୁଥିଲେ । ରୁୂମ୍ ବାହାରୁ ଲକ୍ ହୋଇଥିବା ବେଳେ ପାରିପାଶ୍ୱିକ ପରିସ୍ଥିତିକୁ ଲକ୍ଷ୍ୟ କରିବା ପରେ ଘରୁ ଚୋରି ହେଉଥିବା ଘର ମାଲିକ ପ୍ରବେଶ ଜାଣିପାରିଲେ । ପ୍ରବେଶ ଉପସ୍ଥିତ ବୁଦ୍ଧଖଟାଇ ମୋ’ବନ୍ଧୁକ ଆଣ… ଦେଖିନେବି ବୋଲି ବଡ଼ ପାଟିରେ ଚିତ୍କାର କରିଥିଲେ । ଫଳରେ ଚୋରି କରୁଥିବା ଅଭିଯୁକ୍ତ ଭୟଭୀତ ହୋଇ ଘର ଝରକା ଦେଇ ତୁରନ୍ତ ଚମ୍ପଟ ମାରିଥିଲା । ଘଟଣା ସମ୍ପର୍କରେ ପ୍ରବେଶଙ୍କ ସ୍ତ୍ରୀ ଧରିତ୍ରୀଙ୍କ କହିବା ମୁତାବକ, ଟ୍ରେନ୍ ଯିବା ବେଳେ ଚୋର ଝରକା ଦେଇ ଘରେ ପଶିଥିଲା । ସେମାନଙ୍କୁ ରୁମ୍ ବାହାରୁ ବନ୍ଦ କରି ଅନ୍ୟ ରୁମରେ ଚୋରି କରୁଥିବା ବେଳେ ସ୍ୱାମୀ ଜାଣିିପାରି ଚିତ୍କାର କରିଥିଲେ । ଚୋର ବନ୍ଧୁକ ଭୟରେ ଘର ଭିତରୁ ବାହାରକୁ ଚାଲିଯାଇଥିଲା । ଚୋର ପ୍ରବେଶ ଓ ପ୍ରସ୍ତାନ ଦୃଶ୍ୟ ସିସିଟିଭିରେ କଏଦ ହୋଇଛି । ପୁଲିସ ଉକ୍ତ ସିସିଟିଭି ଫୁଟେଜକୁ ଆଧାର କରି ଅଭିଯୁକ୍ତଙ୍କୁ ଧରିବା ନେଇ ତଦନ୍ତ ଚଳାଇଛି ।