ଭୁବନେଶ୍ୱର: ଚନ୍ଦକା ଥାନା ଅନ୍ତର୍ଗତ ଗିରିଙ୍ଗାପୁଟ ମଶାଣିରୁ ଏକ ନବଜାତ ଶିଶୁପୁତ୍ରକୁ ପୁଲିସ ଉଦ୍ଧାର କରି ଚାଇଲ୍ଡ ଲାଇନ୍କୁ ହସ୍ତାନ୍ତର କରିଛି । ଦୁଇ ଦିନର ଶିଶୁପୁତ୍ରକୁ ଜଣେ କୁମାରୀ ମା’ ସେଠାରେ ଏକ ବୁଦାମୂଳେ ଛାଡ଼ି ପଳାଇଥିବା ଜଣାପଡ଼ିଛି । ଏନେଇ ପୁଲିସ ଓ ଚାଇଲ୍ଡ ଲାଇନ୍ କର୍ତ୍ତୃପକ୍ଷ ତନାଘନା ଆରମ୍ଭ କରି ଦେଇଛନ୍ତି । ସୂଚନା ଅନୁଯାୟୀ, ଗିରିଙ୍ଗାପୁଟ ଅଞ୍ଚଳର ଜଣେ ମହିଳା ଶୌଚ ହେବାକୁ ଯାଇଥିଲେ । ମଶାଣିରୁ ଏକ ନବଜାତ ଶିଶୁର କାନ୍ଦ ଶୁଣି ସେ ଖୋଜାଖୋଜି କରିଥିଲେ ।
ମଶାଣିରେ ଏକ ବୁଦାମୂଳେ କପଡ଼ା ଗୁଡ଼ାହୋଇ ଶିଶୁପୁତ୍ର ପଡ଼ିଥିବା ଦେଖି ସେ ଗାଁ ଲୋକଙ୍କୁ ଜଣାଇଥିଲେ । ଖବରପାଇ ଚନ୍ଦକା ଥାନା ପୁଲିସ ସେଠାରେ ପହଞ୍ଚିଥିଲା । ଶିଶୁପୁତ୍ରଟି ଦୁଇଦିନର ହୋଇଥିବା ଅନୁମାନ କରାଯାଉଛି । ପୁଲିସ ଶିଶୁପୁତ୍ରଟିକୁ ନେଇ ଚାଇଲ୍ଡ ଲାଇନ୍କୁ ହସ୍ତାନ୍ତର କରିଥିଲା । ପ୍ରଥମେ ଶିଶୁପୁତ୍ରକୁ ଭୁବନେଶ୍ୱର ଅତିରିକ୍ତ ଶିଶୁ କଲ୍ୟାଣ ସମିତିରେ ହାଜର କରା ଯାଇଥିଲା । ପରେ ତାକୁ କୋଳଥିଆସ୍ଥିତ ସୁଭଦ୍ରା ମହତାବ ସେବା ସଦନରେ ଛାଡ଼ି ଦିଆଯାଇଛି ।
