ନୂଆଦିଲ୍ଲୀ : ଭାସମାନ ସହର ବିଚାର ଖୁବ୍ଶୀଘ୍ର ସତ ହେବାକୁ ଯାଉଛି । ଦକ୍ଷିଣ କୋରିଆର ବୁସାନରେ ଗଢ଼ିଉଠିବ ବିଶ୍ୱର ପ୍ରଥମ ଭାସମାନ ସହର । ଏଠାରେ ସଂଯୁକ୍ତ ରାଷ୍ଟ୍ର ଦ୍ୱାରା ସମର୍ଥିତ ବୈଜ୍ଞାନିକମାନେ ବିଶ୍ୱର ପ୍ରଥମ ଭାସମାନ ସହରର ପ୍ରୋଟୋଟାଇପ୍ ନିର୍ମାଣ କରୁଛନ୍ତି । ‘ଓସେନିକ୍ସ’ ନାମକ ଏହି ପ୍ରୋଜେକ୍ଟ ବିଷୟରେ ଗତ ବର୍ଷ ଘୋଷଣା ହୋଇଥିଲା । କିନ୍ତୁ ଏହାର ନୂଆ ଡିଜାଇନ୍ର ଫଟୋ ଏବେ ସାମ୍ନାକୁ ଆସିଛି ।
ଫଟୋ ଦ୍ୱାରା ବୈଜ୍ଞାନିକମାନେ ଦର୍ଶାଇଛନ୍ତି, କିଭଳି ପାଣିରେ ପରସ୍ପର ସଂଯୁକ୍ତ ପ୍ଲାଟ୍ଫର୍ମଗୁଡ଼ିକ ମୋଟ୍ ୧୫.୫ ଏକର ଆବୃତ୍ତ କରିବ । ୧୨ ହଜାର ଲୋକଙ୍କ ବସବାସ ପାଇଁ ଏହି ସ୍ଥାନ ପର୍ଯ୍ୟାପ୍ତ ହେବ । ଭାସମାନ ସହର ନିର୍ମାଣର ଖର୍ଚ୍ଚ ୨୦୦ ମିଲିଅନ୍ ଡଲାର ଆକଳନ କରାଯାଇଛି। ୨୦୨୫ ବେଳକୁ ଏହାର ନିର୍ମାଣ ଶେଷ କରିବାକୁ ଯୋଜନା ରହିଛି । ଓସେନିକ୍ସର ସିଇଓ ଫିଲିପ୍ ହଫ୍ମ୍ୟାନ୍ କହିଛନ୍ତି ‘ଏହି ଭାସମାନ ସହର ଢାଞ୍ଚା ସମୁଦ୍ର ଅଭିମୁଖେ ବିସ୍ତାର ଲାଗି ସ୍ଥାୟୀ ମାର୍ଗ ଖୋଜୁଥିବା ତଟୀୟ ସହରଗୁଡ଼ିକ ପାଇଁ ନୂଆ ଭୂମି ସୃଷ୍ଟି କରିବ । ସମୁଦ୍ର ସ୍ତର ବୃଦ୍ଧି ସହ ମଧ୍ୟ ଲୋକେ ଖାପଖୁଆଇ ପାରିବେ ।’
ତଟବର୍ତ୍ତୀ ଅଞ୍ଚଳରେ ବାସ କରୁଥିବା ଲୋକଙ୍କୁ ସାହାଯ୍ୟ କରିବା ଏହି ପ୍ରୋଜେକ୍ଟର ଲକ୍ଷ୍ୟ । ସମୁଦ୍ର ସ୍ତର ବୃଦ୍ଧି ଯୋଗୁ ଧ୍ୱଂସ ଆଶଙ୍କା ଭିତରେ ଥିବା ସମୁଦାୟ ଏହା ଦ୍ୱାରା ବିଶେଷ ଲାଭବାନ ହୋଇପାରିବେ । ଓସେନିକ୍ସ ଅନୁସାରେ, ବିଶ୍ୱରେ ପ୍ରତି ୫ ଜଣରେ ୨ ଜଣ ବ୍ୟକ୍ତି ସମୁଦ୍ର ତଟର ୧୦୦ କିମି ମଧ୍ୟରେ ବାସ କରୁଛନ୍ତି । ପ୍ରତି ବର୍ଷ ବନ୍ୟା ଯୋଗୁ ଲକ୍ଷାଧିକ ଲୋକ ବାସହରା ହେଉଛନ୍ତି । ଏହି ସ୍ଥିତିରେ ନିରନ୍ତର ଓ ସ୍ଥାୟୀ ସହର ପାଇଁ ଓସେନିକ୍ସ ଏକ ଉତ୍ତମ ବିକଳ୍ପ ହେବ ବୋଲି ଏହି ପ୍ରକଳ୍ପର ମୁଖ୍ୟ ସ୍ଥାପତ୍ୟ ସଂସ୍ଥାର ନିର୍ଦ୍ଦେଶକ କହିଛନ୍ତି । ଚମତ୍କାର ନୀଳ ଲାଗୁନ୍ ଉପରେ ଏହି ଭାସମାନ ସହର ନିର୍ମିତ ହେବ । ପୋଲ ଦ୍ୱାରା ପ୍ରତ୍ୟେକ ପ୍ଲାଟ୍ଫର୍ମ ପରସ୍ପର ସହ ଯୋଡ଼ି ହେବ ।
