ବାଇକ୍ – ଟ୍ରକ୍ ମୁହାଁମୁହିଁ, ୨ ମୃତ

ଢେଙ୍କାନାଳ: ଭୁବନ ଥାନା ନୀଳକଣ୍ଠପୁର ନିକଟସ୍ଥ ରଙ୍ଗମାଟିଆ ପୋଲି ବୁଲାଣିରେ ମୋଟରସାଇକେଲକୁ ଏକ ଟ୍ରକ୍ ଧକ୍କାଦେବାରୁ ୨ ଜଣ ମୃତ୍ୟୁବରଣ କରିଛନ୍ତି । ଅପରାହ୍ନରେ କରମୁଳ ଗ୍ରାମରୁ ଏକ ବିବାହ ଉତ୍ସବରେ ଯୋଗ ଦେବାକୁ ଦୁଇ ଜଣ ଯୁବକ ବାଇକ୍ ଯୋଗେ ବ୍ରାହ୍ମଣୀପୋଲ ପଟରୁ ଭୁବନ ପଟକୁ ଆସୁଥିଲେ । ସେତିକିବେଳେ ବିପରୀତ ଦିଗରୁ ଯାଉଥିବା ଏକ ଟ୍ରକ (ଓଆର ୦୪ଇ ୧୦୦୫) ମାଙ୍କଡ଼ା ପଥର ଅନଲୋଡ କରି ଦ୍ରୁତ ଗତିରେ ଯାଉଥିବାବେଳେ ମୁହାଁମୁହିଁ ମଟରସାଇକେଲ (ଓଆର ଜେ୪୩୯୯) ସହ ଧକ୍କା ଦେଇଥିଲା । ଫଳରେ ଗୁରୁତର ହୋଇ ପଡ଼ିରହିଥିଲେ ଦୁଇ ଯୁବକ । ଦୀର୍ଘ ସମୟ ୧୦୮କୁ ଅପେକ୍ଷା କରିବା ପରେ ବାହାଘର ଉତ୍ସବକୁ ଯାଉଥିବା ଏକ ବୋଲେରୋରେ ଦୁଇ ଜଣଙ୍କୁ ଢେଙ୍କାନାଳ ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା । ସେଠାରେ ଦୁଇ ଜଣଙ୍କୁ ମୃତ ଘୋଷଣା କରିଥିଲେ ଡାକ୍ତର । ମୃତକ ଦୁଇ ଜଣ ହେଲେ କରମୂଳ ଗ୍ରାମର ବୋଲି ଜଣାପଡ଼ିଛି । ଘଟଣାସ୍ଥଳରେ ଉତ୍ତ୍ୟକ୍ତ ଲୋକ ରାସ୍ତାରୋକ କରିଥିଲେ । ପରେ ଭୁବନ ପୁଲିସ ପହଞ୍ଚି ଲୋକଙ୍କୁ ବୁଝାସୁଝା କରିବାରୁ ରାସ୍ତାରୋକ ହଟିଥିଲା ।