ନୂଆଦିଲ୍ଲୀ : ଆଜି ସ୍ଥାନୀୟ ମୁଖ୍ୟାଳୟରେ କଂଗ୍ରେସ କାର୍ଯ୍ୟକାରୀ କମିଟି (ସିଡବ୍ଲ୍ୟୁସି) ବୈଠକ ଅନୁଷ୍ଠିତ ହେବ ବୋଲି ଜଣାପଡିଛି । ସଦ୍ୟ ଘୋଷିତ ୫ ରାଜ୍ୟର ନିର୍ବାଚନ ଫଳାଫଳରେ କଂଗ୍ରେସ ଏକପ୍ରକାର ଚିତ୍ପଟାଙ୍ଗ୍ ମାରିଥିବାରୁ ହାଇକମାଣ୍ଡ ଦଳୀୟ ପରାଜୟର କାରଣ ଖୋଜିବାକୁ ବୈଠକରେ ମାନସ ମନ୍ଥନ କରିବେ ବୋଲି ଆଶା କରାଯାଉଛି । ଏହାବ୍ୟତୀତ କଂଗ୍ରେସ ସଭାପତି ସମେତ ଅନ୍ୟ କର୍ମକର୍ତ୍ତାଙ୍କ ନିର୍ବାଚନକୁ ସେପ୍ଟେମ୍ବର ପରିବର୍ତ୍ତେ ଆଗୁଆ କରାଯିବା ଉପରେ ମଧ୍ୟ ଆଲୋଚନା କରାଯିବ ।
ସୂଚନାଯୋଗ୍ୟ ପଞ୍ଜାବରେ କଂଗ୍ରେସ କ୍ଷମତାଚ୍ୟୁତ ହୋଇଥିବାବେଳେ ୧୧୭ ମଧ୍ୟରୁ କେବଳ ୧୮ଟି (୨୦୧୭ ନିର୍ବାଚନରେ ପାଇଥିଲା ୭୭ ଆସନ) ଆସନ ହାତେଇ ପାରିଛି । ଅପରପକ୍ଷରେ ଉତ୍ତରପ୍ରଦେଶର ୪୦୩ ମଧ୍ୟରୁ କଂଗ୍ରେସ କେବଳ ୨ଟି (ଗତ ନିର୍ବାଚନରେ ପାଇଥିଲା ୭ ଆସନ) ଆସନରେ ବିଜୟୀ ହୋଇଥିବାବେଳେ ଉତ୍ତରାଖଣ୍ଡରେ ୭୦ ମଧ୍ୟରୁ ୧୯, ମଣିପୁରରେ ୬୦ ମଧ୍ୟରୁ ୫ ଏବଂ ଗୋଆରେ ୪୦ ମଧ୍ୟରୁ ୧୧ଟି ଆସନ ଅକ୍ତିଆର କରିଛି । ତେଣୁ ଏଭଳି ଦୟନୀୟ ପ୍ରଦର୍ଶନ ଯୋଗୁଁ ଦଳର ୨୩ ଜଣ ତୁଙ୍ଗ ନେତା (ଜି-୨୩) ତୁରନ୍ତ ନେତୃତ୍ୱ ପରିବର୍ତ୍ତନ ପାଇଁ ଦାବି କରିଥିବା ଜଣାପଡିଛି ।
