ମଝି ଆକାଶରେ ମହିଳାଙ୍କ ସହ ଯାହା ଘଟିଲା ଜାଣିଲେ ଆଶ୍ଚର୍ଯ୍ୟ ହେବେ….

ୱାଶିଂଟନ୍ : ମଝି ଆକାଶରେ ମହିଳାଙ୍କ ସହ ଦୁଷ୍କର୍ମ । ଆମେରିକାର ନ୍ୟୁଜର୍ସିରୁ ଲଣ୍ଡନ ଯାଉଥିବା ବିମାନରେ ବିଜିନେସ୍ କ୍ଲାସରେ ଯାତ୍ରା କରୁଥିବା ଜଣେ ମହିଳା ଯାତ୍ରୀଙ୍କୁ ଦୁଷ୍କର୍ମ କରାଯାଇଥିବା ଅଭିଯୋଗ ହୋଇଛି । ଏହି ମାମଲାରେ ଅଭିଯୁକ୍ତ ବ୍ୟକ୍ତିଙ୍କୁ ବ୍ରିଟେନରୁ ଗିରଫ କରାଯାଇଛି । ତେବେ ପରେ ତାଙ୍କୁ ଜାମିନ ପ୍ରଦାନ କରାଯାଇଛି । ଯାତ୍ରୀମାନେ ଶୋଇଥିବା ସମୟରେ ଏହାର ସୁଯୋଗ ନେଇ ମହିଳାଙ୍କୁ ଅଭିଯୁକ୍ତ ଦୁଷ୍କର୍ମ କରିଥିଲା । ୟୁନାଇଟେଡ୍ ଏୟାରଲାଇନ୍ସର ବିମାନରେ ଏହି ଘଟଣା ଘଟିଛି । ତେବେ ଏହି ଘଟଣା ଘଟିବା ପରେ ପୀଡିତା ନିଜ ସହ ହୋଇଥିବା କୁକର୍ମ ସମ୍ପର୍କରେ ବିମାନ କର୍ମଚାରୀଙ୍କୁ କହିଥିଲେ । ଏହା ପରେ ବିମାନ କର୍ମଚାରୀମାନେ ବ୍ରିଟେନ ପୋଲିସକୁ ଖବର ଦେଇଥିଲେ । ନ୍ୟୁଜର୍ସିରୁ ଲଣ୍ଡନକୁ ସିଧାସଳଖ ବିମାନ ଉଡ଼ାଣ ପାଇଁ ପ୍ରାୟ ୭ ଘଣ୍ଟା ସମୟ ଲାଗେ । ବିମାନଟି ବ୍ରିଟେନର ହିଥ୍ରୋରେ ଅବତରଣ କରିବା ପରେ ବିମାନରେ ପହଞ୍ଚି ଅଭିଯୁକ୍ତକୁ ଗିରଫ କରିଥିଲେ ପୋଲିସ ଏବଂ ପୀଡିତାଙ୍କୁ ରେପ୍ କାଉନସେଲିଂ ସୁଟକୁ ନିଆଯାଇଥିଲା । ଏହାସହ ପୋଲିସ କର୍ମଚାରୀମାନେ ବିମାନର ଫୋରେନସିକ୍ ପରୀକ୍ଷା ମଧ୍ୟ କରିଥିଲେ । ଗତ ସପ୍ତାହ ସୋମବାର ଏହି ଘଟଣା ଘଟିଥିବା କୁହାଯାଉଛି । ଉଭୟ ପୀଡିତା ଏବଂ ଅଭିଯୁକ୍ତଙ୍କ ବୟସ ୪୦ ବର୍ଷ ବୋଲି ଜଣାପଡ଼ିଛି । ଅଭିଯୁକ୍ତ ଜଣକ ବ୍ରିଟେନର ବାସିନ୍ଦା ଏବଂ ପୀଡିତା ମହିଳା ମଧ୍ୟ ବ୍ରିଟେନରେ ରୁହନ୍ତି । ଦି ସନ୍ ରିପୋର୍ଟ ଅନୁସାରେ, ଅଭିଯୁକ୍ତ ଏବଂ ପୀଡିତା ବିଜିନେସ କ୍ଲାସର ଭିନ୍ନ ଭିନ୍ନ ସିଟରେ ବସିଥିଲେ । ତେବେ ବିମାନରେ ବସିବା ପୂର୍ବରୁ ଉଭୟେ ପୂର୍ବରୁ ପରିଚିତ ନଥିଲେ । କିନ୍ତୁ ଘଟଣା ଦିନ ପୀଡିତା ଏବଂ ଅଭିଯୁକ୍ତ ଲାଉଞ୍ଜରେ ଏକାଠି ମଦ୍ୟପାନ କରୁଥିବା ଜଣାପଡ଼ିଛି । ଅଭିଯୁକ୍ତକୁ ଗିରଫ କରିବା ସହ ମାମଲାରେ ତଦନ୍ତ ଜାରି ରହିଛି ବୋଲି ବ୍ରିଟିଶ ପୋଲିସ କହିଛି । ଉଡ଼ାଣ ସମୟରେ ଯୌନ ନିର୍ଯାତନା ଘଟଣା ବିରଳ ବୋଲି ସେ କହିଛନ୍ତି ।