ଗଞ୍ଜାମ : ପୋଲସରା ଥାନା ଅଞ୍ଚଳର ଜନୈକ ପ୍ରଧାନ ଶିକ୍ଷକଙ୍କ ଗୁଣ୍ଡାଗିରି ଦେଖିବାକୁ ମିଳିଛି । କାର୍ଯ୍ୟରତ ଓଏପିଏଫ ସିପାହୀଙ୍କୁ ଆକ୍ରମଣ କରିବା ପ୍ରଧାନ ଶିକ୍ଷକଙ୍କୁ ମହଙ୍ଗା ପଡିଛି । ଶେଷରେ ପୁଲିସ୍ ଦ୍ୱାରା ଗିରଫ ହୋଇଛନ୍ତି ସାନବରଗାଁ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ ସତ୍ୟ ସନାତନ ବେହେରା । ମଙ୍ଗଳବାର ପୋଲସରା ବସଷ୍ଟାଣ୍ଡରେ କୌଣସି କାରଣରୁ କୋଦଳା ଅଞ୍ଚଳର ଜଣେ ବ୍ୟକ୍ତିଙ୍କୁ ପ୍ରଧାନ ଶିକ୍ଷକ ଶ୍ରୀ ବେହେରା ଆକ୍ରମଣ କରିଥିଲେ । ଏହି ସମୟରେ ପୋଲସରା ବସଷ୍ଟାଣ୍ଡରେ କାର୍ଯ୍ୟରତ ଓଏପିଏଫ ସିପାହୀ ସୀମାଞ୍ଚଳ ଶବର କାହିଁକି ଜନଗହଳି ମଧ୍ୟରେ ବିଶୃଙ୍ଖଳା ସୃଷ୍ଟି କରୁଛ ବୋଲି କହିଥିଲେ । ଏଥିରେ ପ୍ରଧାନ ଶିକ୍ଷକ ଶ୍ରୀ ବେହେରା ଉତ୍କ୍ଷିପ୍ତ ହୋଇ ତାଙ୍କୁ ମଧ୍ୟ ଆକ୍ରମଣ କରିଥିଲେ । ସିପାହୀ ସୀମାଞ୍ଚଳଙ୍କୁ ଆକ୍ରମଣ ହେଉଥିବା ବେଳେ କାର୍ଯ୍ୟରତ ଅନ୍ୟ ପୁଲିସ କର୍ମଚାରୀମାନେ ଆକ୍ରମଣକାରୀ ପ୍ରଧାନ ଶିକ୍ଷକଙ୍କୁ କାବୁକରି ଥାନାକୁ ଆଣିଥିଲେ ।
ସିପାହୀ ସୀମାଞ୍ଚଳ ଶବରଙ୍କ ଅଭିଯୋଗ କ୍ରମେ ପୋଲସରା ଥାନାରେ ଏକ ମାମଲା ରୁଜୁ ହୋଇଥିଲା । ପ୍ରଧାନ ଶିକ୍ଷକ ଶ୍ରୀ ବେହେରାଙ୍କୁ ଗିରଫ କରି ପୁଲିସ୍ କୋର୍ଟ ଚାଲାଣ କରିଥିବା ଥାନାଧିକାରୀ ଜିତେନ୍ଦ୍ର କୁମାର ମଲ୍ଲିକ ସୂଚନା ଦେଇଛନ୍ତି । ପ୍ରକାଶ ଥାଉକି ସାନବରଗାଁ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକଙ୍କ ବିରୁଦ୍ଧରେ ମଧ୍ୟ ଗ୍ରାମବାସୀ ବିଇଓଙ୍କୁ ଲିଖିତ ଅଭିଯୋଗ ଦେଇ ସ୍କୁଲ ଗେଟରେ ତାଲା ପକାଇଥିବା ଜଣାପଡିଛି ।
ଗ୍ରାମବାସୀ ଅଭିଯୋଗ କରିଛନ୍ତି ଯେ, ପ୍ରଧାନ ଶିକ୍ଷକ ସତ୍ୟସନାତନ ବେହେରା ବିଦ୍ୟାଳୟ ପରିସରରେ ମଦ ଓ ଭାଙ୍ଗ ପାନକରି ଗ୍ରାମ୍ୟ କମିଟି ସଭାପତି, ପରିଚାଳନା କମିଟି ସଭାପତି ଓ ସଦସ୍ୟଙ୍କୁ ଅଶ୍ଳୀଳ ଭାଷାରେ ଗାଳିଗୁଲଜ କରିଥିଲେ । ଗ୍ରାମବାସୀ ବିଇଓଙ୍କୁ ଅଭିଯୋଗ କରିବା ସହ ଶିକ୍ଷକଙ୍କୁ ଅନ୍ୟତ୍ର ବଦଳି କରିବାକୁ ଦାବିକାରି ବିଦ୍ୟାଳୟ ଫାଟକରେ ତାଲା ପକାଇଥିବା ପରିଚାଳନା କମିଟି ସଭାପତି ପ୍ରକାଶ କରିଛନ୍ତି । ବର୍ତ୍ତମାନ ପ୍ରଧାନ ଶିକ୍ଷକ ଶ୍ରୀ ବେହେରା ଜେଲରେ ଥିବା ବେଳେ ଅନ୍ୟଜଣେ ଶିକ୍ଷକଙ୍କୁ ତୁରନ୍ତ ନିଯୁକ୍ତି ଦେବାକୁ ଗ୍ରାମବାସୀ ଦାବି କରିଛନ୍ତି ।
