ଉତ୍ତରାଖଣ୍ଡ: ଉତ୍ତରାଖଣ୍ଡର ଚାମୋଲି ଜିଲ୍ଲାରୁ ଏକ ହୃଦୟ ବିଦାରକ ଖବର ସାମ୍ନାକୁ ଆସିଛି । ଗୋଟିଏ ପରିବାରର ପାଞ୍ଚ ଜଣଙ୍କ ମୃତଦେହ ଏକ ବନ୍ଦ କୋଠରୀରୁ ସନ୍ଦିଗ୍ଧ ଅବସ୍ଥାରେ ଉଦ୍ଧାର ହୋଇଛି । ଧୁନି ଗାଁରେ ଏହି ଘଟଣା ଘଟିଛି । ଗୋଟିଏ କୋଠରୀରେ ପତ୍ନୀ ଏବଂ ତିନି ଶିଶୁଙ୍କ ମୃତଦେହ ଏବଂ ଅନ୍ୟ ଏକ କୋଠରୀରେ ଘରର ମୁଖିଆଙ୍କ ମୃତଦେହ ଦେଖିବାକୁ ମିଳିଥିଲା । ବର୍ତ୍ତମାନ ମୃତ୍ୟୁର କାରଣ ଜଣା ପଡିନାହିଁ । ସୂଚନା ମୁତାବକ ପୋଲିସ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ କରୁଛି । ଘଟଣାକୁ ନେଇ ଗାଁରେ ଶୋକାକୂଳ ପରିବେଶ ଦେଖିବାକୁ ମିଳିଛି ।
ସୂଚନା ଅନୁଯାୟୀ, ଧୁନି ଗାଁ ନିବାସୀ ଦୀନେଶ ଲାଲ ପିଆରଡିରେ କାମ କରୁଥିଲେ । ଗ୍ରାମବାସୀ କହିଛନ୍ତି ଯେ ଦୀନେଶ ଲାଲଙ୍କ ମୃତଦେହ ଗୋଟିଏ କୋଠରୀରେ ଦଉଡିରେ ଛାତରେ ଝୁଲୁଥିବା ବେଳେ ସନ୍ଦେହଜନକ ପରିସ୍ଥିତିରେ ପତ୍ନୀ ଏବଂ ଶିଶୁଙ୍କ ମୃତଦେହ ଅନ୍ୟ କୋଠରୀରେ ଦେଖିବାକୁ ମିଳିଥିଲା । ତେବେ ଦୀନେଶ ନିଜେ ପିଲା ଏବଂ ପତ୍ନୀଙ୍କୁ ହତ୍ୟା କରିଛନ୍ତି ନା ଏଥିରେ କିଛି ଷଡଯନ୍ତ୍ର ଅଛି, ତାହା ଲୋକଙ୍କ ମନରେ ପ୍ରଶ୍ନ ଉଙ୍କି ମାରୁଛି । ମୃତ୍ୟୁର ପ୍ରକୃତ କାରଣ କେବଳ ଏହି ଘଟଣାର ପୋଷ୍ଟ ମର୍ଟମ ରିପୋର୍ଟ ଆସିବା ପରେ ଜଣା ପଡିବ ।
