ଭୁବନେଶ୍ୱର: ଜଳସମ୍ପଦ ଅଧିକାରିଣୀଙ୍କ ଘରୁ ଚୋରି ମାମଲାରେ ଖଣ୍ଡଗିରି ଥାନା ପୁଲିସ ୩ଜଣ ଚୋରଙ୍କୁ ଗିରଫ କରି ବୁଧବାର କୋର୍ଟ ଚାଲାଣ କରିଛି । ଗିରଫ ଅଭିଯୁକ୍ତମାନେ ହେଲେ ଢେଙ୍କାନାଳ ଜିଲ୍ଲା ବାହାପୁର, ଝୁମ୍ପୁଡିଆର ମଣ୍ଟୁ ନାଏକ (୨୫) ଓ ପିଣ୍ଟୁ ନାଏକ (୨୨), ନୟାଗଡ଼ ଜିଲ୍ଲା ଦଶପଲ୍ଲା ଢୋଲମରାର ସାବନ ନାଏକ (୨୬) । ଏମାନେ ସମସ୍ତେ ନୟାପଲ୍ଲୀ ଥାନା ଅନ୍ତର୍ଗତ ନୀଳକଣ୍ଠ ନଗର ମୁଣ୍ଡାସାହିରେ ରୁହନ୍ତି । ଅଭିଯୁକ୍ତ ମାନଙ୍କ ଠାରୁ ଗୋଟିଏ ଏଲ୍ଇଡି ଟିଭି, ଏକଯୋଡ଼ା ସୁନାକାନର, ଗୋଟିଏ ଲକେଟ୍ ଓ ନଗଦ ୨ହଜାର ଟଙ୍କା ଜବତ କରାଯାଇଛି । ଏହି ମାମଲାରେ ସମ୍ପୃକ୍ତ ଥିବା ଅନ୍ୟ ଚୋରଙ୍କୁ ପୁଲିସ ଧରିବାକୁ ଉଦ୍ୟମ ଚଳାଇଛି ।
ସୂଚନା ଅନୁଯାୟୀ, ଗତ ଅଗଷ୍ଟ ୩୦ ତାରିଖରେ ଜଳସମ୍ପଦ ବିଭାଗର ଅଧିକାରିଣୀ ସୋନାଲି ଶୁଭଦର୍ଶିନୀ ଘରେ ନଥିଲେ । ଘରେ ନଥିବା ସମୟରେ କେତେକ ଦୁବୃର୍ତ୍ତ ତାଙ୍କ ଘରେ ପଶି ଲୁଟ୍ପାଟ କରିଥିଲେ । ଘରକୁ ଫେରି ଦେଖିବାବେଳକୁ ସବୁ ଆସବାବପତ୍ର ଏପଟ ସେପଟ ହୋଇ ପଡିଛି । ଘରର ମୁଖ୍ୟ ଫାଟକ ତାଲା ଓ ଆଲମିରା ତାଲା ଭଙ୍ଗା ଯାଇଛି । ବହୁ ଦାମି ଜିନିଷ ଚୋରି କରି ନେବାସହ ଆଲମିରା ତାଲା ଭାଙ୍ଗି ନଗଦ ୧୫ ହଜାର ଟଙ୍କା ନେଇଯାଇଥିବା ଜାଣିବାକୁ ପାଇଥିଲେ । ଗତ ୧୦ ତାରିଖ ମଧ୍ୟରେ ତାଙ୍କ ଘରୁ ୨ଥର ଚୋରି ହୋଇଥିବା ସହ ସିସିଟିଭିର ହାର୍ଡ ଡିକ୍ସ ଅଭିଯୁକ୍ତମାନେ ନେଇଯାଇଥିଲେ । ଏନେଇ ଓଏଏସ୍ ସୋନାଲି ଶୁଭଦର୍ଶିନୀ ଖଣ୍ଡଗିରି ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗକୁ ଭିତ୍ତି କରି ପୁଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିଲା ।
