କରୋନା ଆକ୍ରାନ୍ତ ହେବା ପରେ ଏବେ ଭେଣ୍ଟିଲେଟରରେ ଫିଲ୍ମ କ୍ରିଟିକ ରାଜୀବ ମସନ୍ଦ

ନୂଆଦିଲ୍ଲୀ: ପ୍ରସିଦ୍ଧ ପତ୍ରକାର, ଫିଲ୍ମ କ୍ରିଟିକ ରାଜୀବ ମସନ୍ଦ କରୋନା ଆକ୍ରାନ୍ତ ହେବା ପରେ ଏବେ ତାଙ୍କ ସ୍ୱାସ୍ଥ୍ୟବସ୍ଥା ବିଗୁଡୁଥିବା ଖବର ସାମ୍ନାକୁ ଆସିଛି । ସ୍ୱାସ୍ଥ୍ୟବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ମୁମ୍ବାଇର କୋକଲାବେନ ଧିରୁଭାଇ ଅମ୍ବାନୀ ହସ୍ପିଟାଲରେ ଭର୍ତ୍ତି କରାଯାଇଥିଲା । ଏବେ ତାଙ୍କୁ ଭେଣ୍ଟିଲେଟରକୁ ସିଫ୍ଟ କରାଯାଇଛି । ରାଜୀବଙ୍କ ଜଣେ ବନ୍ଧୁ କହିଛନ୍ତି, ତାଙ୍କ ସ୍ୱାସ୍ଥ୍ୟ ଗୁରୁତର ରହିଛି । ଡାକ୍ତରୀ ଟିମ ସଂପୂର୍ଣ୍ଣ ଚେଷ୍ଟା କରୁଛନ୍ତି । ସମସ୍ତେ ତାଙ୍କ ପାଇଁ ପ୍ରାର୍ଥନା କରିବା ଦରକାର । ତେବେ ବର୍ତମାନ ଯାଏଁ ତାଙ୍କ ପରିବାର ଲୋକେ ମିଡିଆ ସହ ଏବିଷୟରେ କୌଣସି ସୂଚନା ପ୍ରଦାନ କରିନାହାନ୍ତି । ସୋସିଆଲ ମିଡିଆରେ ଏହି ଖବର ଦୃତବେଗରେ ପ୍ରଚାର ହେବାରେ ଲାଗିଛି । ଲୋକେ ରାଜୀବଙ୍କ ସ୍ୱାସ୍ଥ୍ୟ ପାଇଁ ପ୍ରାର୍ଥନା କରୁଛନ୍ତି । ଟ୍ୱିଟରରେ ରାଜୀବ ନମ୍ବର ୧ରେ ଟ୍ରେଣ୍ଡ କରୁଛନ୍ତି । ଏମିତିରେ ଅନେକ ବଲିଉଡ ସିଲେବ୍ରିଟି ବି ତାଙ୍କ ଆଶୁ ଆରୋଗ୍ୟ କାମନା କରିଛନ୍ତି ।