ପାରଳାଖେମୁଣ୍ଡି : ଗଜପତି ଜିଲ୍ଲା ମୋହନା ବ୍ଲକ ଗୋଠକେଳି ଗାଁର ମାନିନୀ ବେହେରା ନାମ୍ନୀ ଜନୈକା ମହିଳାଙ୍କୁ ପୋଡିମାରିଦେବା ଘଟଣାରେ ତାଙ୍କ ସ୍ୱାମୀ ମଧୁସୂଦନ ବେହେରାଙ୍କୁ ମଙ୍ଗଳବାର ପୁଲିସ ଗିରଫ କରିଛି । ମୋହନା ଥାନା ଢେପାଗୁଡା ପଞ୍ଚାୟତ ଗୋଠକେଳି ଗାଁରେ ଗତ ୧୩ ତାରିଖ ମଧୁସୂଦନ ବେହେରାଙ୍କ ସ୍ତ୍ରୀ ମାନିନୀଙ୍କୁ ଜିଅନ୍ତା ଜାଳି ଦିଆଯାଇଥିବା ପୁଲିସରେ ଅଭିଯୋଗ ହୋଇଥିଲା । ମାନିନୀଙ୍କୁ ଅର୍ଦ୍ଧଦଗ୍ଧ ଅବସ୍ଥାରେ ବାପ ଘର ଲୋକ ପ୍ରଥମେ ଏମକେସିଜି ଓ ପରେ ଭୁବନେଶ୍ୱରର ଏକ ଘରୋଇ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
ଏନେଇ ଭୁବନେଶ୍ୱରର ଭରତପୁର ଥାନାରେ ମାମଲା ରୁଜୁ ହୋଇଥିଲା । ରବିବାର ମୋହନା ଥାନାରେ ମାନିନୀର ଭାଇ କୁମୁଦ ମୋହନା ଥାନାରେ ନିଜ ଭଉଣୀକୁ ଜିଅନ୍ତା ଜାଳି ମାରିଦେଇଥିବାର ଲିଖିତ ଅଭିଯୋଗ କରିଥିଲେ । ଏନେଇ ମୋହନା ଥାନାରେ ମାମଲା ରୁଜ ହୋଇଛି । ତେବେ ମୃତ ମାନିନୀଙ୍କ ଶବ ଭୁବନେଶ୍ୱରରେ ବ୍ୟବଚ୍ଛେଦ ପରେ ପରିବାରବର୍ଗଙ୍କୁ ହସ୍ତାନ୍ତର କରାଯାଇଥିଲା । ସୋମବାର ଶବକୁ ଗୋଠକେଳି ଗ୍ରାମକୁ ଆଣି ଶୋକାକୁଳ ପରିବେଶରେ ସଂସ୍କାର କରାଯାଇଥିଲା । ଏନେଇ ମୋହନା ଥାନା ଅଧିକାରୀ ସୁଜିତ କୁମାର ନାୟକ ସମସ୍ତ ଘଟଣାର ତଦନ୍ତ କରି ପ୍ରାଥମିକ ଭାବେ ମୃତ ମହିଳାଙ୍କ ସ୍ୱାମୀ ମଧୁସୂଦନ ବେହେରାଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଜଣାଇବା ସହ ଅଧିକ ତଦନ୍ତ ଚାଲିଥିବାର ପ୍ରକାଶ କରିଛନ୍ତି ।
