ନୂଆଦିଲ୍ଲୀ : ବିଏସ୍ଏଫ୍ କର୍ମୀ ଗୁଜରାଟ କଚ୍ଛ କ୍ଷେତ୍ରରୁ ଜଣେ ୨୦ବର୍ଷୀୟ ଯୁବକକୁ ଧରିଛନ୍ତି । ଯୁବକ ଜଣକ ପ୍ରେମିକାକୁ ଭେଟିବା ପାଇଁ ଦେଶର ସୀମା ପାର୍ ହୋଇ ପଡ଼ୋଶୀ ରାଷ୍ଟ୍ର ପାକିସ୍ତାନ ଯାଉଥିବା ବେଳେ ଧରାପଡ଼ି ଥିଲେ । ପାକିସ୍ତାନର କରାଚି ଅନ୍ତର୍ଗତ ଶାହ ଫୈଜଲ ସହରର ଜଣେ ଝିଅକୁ ଭେଟିବା ପାଇଁ ମହାରାଷ୍ଟ୍ରର ଉସ୍ମାନାବାଦଠାରୁ କଚ୍ଛ ପର୍ଯ୍ୟନ୍ତ ପ୍ରାୟ ୧୨ଶହ କିଲୋମିଟର ରାସ୍ତା ଅତିକ୍ରମ କରିଥିବା ଯୁବକ ଜଣକ କହିଥିଲେ । ତାଙ୍କୁ ଭାରତ-ପାକ୍ ଅନ୍ତର୍ଜାତୀୟ ସୀମାଠାରୁ ଦେଢ କିଲୋମିଟର ଦୂର ଧୋଲାବୀରା ଅଞ୍ଚଳରୁ ଉଦ୍ଧାର କରାଯାଇଥିଲା ।
ସିଦ୍ଦିକି ମହମ୍ମଦ ଜିଶାନ ନାମକ ୨୦ବର୍ଷୀୟ ଯୁବକ ଜଣଙ୍କର ଫେସ୍ବୁକ୍ରେ ପାକିସ୍ତାନର ଜଣେ ଝିଅ ସହ ବନ୍ଧୁତା ହୋଇଥିଲା । ପରେ ହ୍ୱାଟ୍ସଆପ୍ ନମ୍ବର ଦିଆନିଆ ହୋଇ ଉଭୟଙ୍କ ସମ୍ପର୍କ ଅଧିକ ବଢିଥିଲା । ଧୀରେଧୀରେ ଜିଶାନର ବାନ୍ଧବୀ ସହ ଭେଟିବାକୁ ମନ ହୋଇଥିଲା । ତେଣୁ ସେ ଗୁଗୁଲ ମ୍ୟାପ୍ ବ୍ୟବହାର କରି ନିଜ ଗନ୍ତବ୍ୟ ପଥରେ ବାହାରି ଥିଲେ । ତେବେ ମହାରାଷ୍ଟ୍ର ପୁଲିସ ଗୁଜୁରାଟ ପୁଲିସକୁ ଏକ ନିଖୋଜ ମାମଲା ସମ୍ପର୍କରେ ଜଣାଇଥିଲା । ନିଖୋଜ ସମ୍ପର୍କିିତ ମାମଲାଟି ପିଲାଟିର ପିତା-ମାତାଙ୍କ ଦ୍ୱାରା ଦିଆଯାଇଥିଲା । ଗୁଜରାଟ ପୁଲିସ ବିଏସ୍ଏଫ୍ ଯବାନଙ୍କୁ ସହାୟତା ମାଗିଥିଲା । ପିଲାଟିର ମୋବାଇଲ୍ ଫୋନ୍ ଟ୍ରାକିଂ କରି କଚ୍ଛ ସୀମାରୁ ଅଚେତ ଅବସ୍ଥାରେ ଉଦ୍ଧାର କରାଯାଇଥିଲା । ପାଖରେ ଥିବା ଆଧାରକାର୍ଡ, ଏଟିଏମ୍କାର୍ଡ ଏବଂ ପ୍ୟାନ୍କାର୍ଡ ଦ୍ୱାରା ତାଙ୍କ ପରିଚୟ ମିଳିଥିଲା । ଉଦ୍ଧାର ପରେ ବିଏସ୍ଏଫ୍ ପକ୍ଷରୁ କରାଯାଇଥିବା ତଲାସୀ ଅଭିଯାନରେ ଯୁବକଙ୍କର ବାଇକ୍ ମିଳିଥିଲା । ସୀମାରେ ପହଞ୍ଚିବା ପରେ ଯୁବକ ନିଜ ବାଇକ୍ ଛାଡ଼ି ଦେଇଥିଲେ । ଯୁବକଙ୍କୁ ଉଦ୍ଧାର କରିବା ପରେ ପୁଲିସ ହେପାଜତରେ ଦିଆଯାଇଛି ।
ପାକ୍ ପ୍ରେମିକାକୁ ଭେଟିବା ଉଦ୍ୟମ କରି ଯୁବକ ଗିରଫ
