ଲେହ : ସୀମା ବିବାଦକୁ ନେଇ ଭାରତ ଓ ଚୀନ ମଧ୍ୟରେ ଉତ୍ତେଜନା ଲାଗି ରହିଥିବାବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଅଚାନକ ଲେହରେ ପହଞ୍ଚିଛନ୍ତି। ଚିଫ୍ ଅଫ ଡିଫେନ୍ସ ଷ୍ଟାଫ ବିପିନ ରାୱତଙ୍କ ସହିତ ପ୍ରଧାନମନ୍ତ୍ରୀ ଏହି ଗସ୍ତ କରିଛନ୍ତି। ସିଡିଏସଙ୍କ ସହିତ ମିଶି ସେ ସୀମାରେ ସ୍ଥିତିର ସମୀକ୍ଷା କରିବେ ବୋଲି ସୂଚନା ମିଳିଛି। ସିଡିଏସ ବିପିନ ରାୱତ ଆଜି ଲେହ ଗସ୍ତ କରିବାର ଥିଲା। ପ୍ରଧାନମନ୍ତ୍ରୀ ଗସ୍ତ କରିବାର କୌଣସି କାର୍ଯ୍ୟକ୍ରମ ନ ଥିଲା। କିନ୍ତୁ ପ୍ରଧାନମନ୍ତ୍ରୀ ଲେହ ଯିବାକୁ ସ୍ଥିର କରି ଅଚାନକ ଆସି ପହଞ୍ଚିଛନ୍ତି।
ଗତ ମେ ମାସରୁ ଚୀନ ସହିତ ସୀମାରେ ଉତ୍ତେଜନା ଲାଗି ରହିଛି। ଏପରି ସ୍ଥିତିରେ ପ୍ରଧାନମନ୍ତ୍ରୀଙ୍କ ଲେହ ଗସ୍ତ ବେଶ୍ ଗୁରୁତ୍ଵପୂର୍ଣ୍ଣ ବୋଲି କୁହାଯାଉଛି। ଶୁକ୍ରବାର କେବଳ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଲେହ ଯିବାର କାର୍ଯ୍ୟକ୍ରମ ଥିଲା। ମାତ୍ର ଏହା ପୂର୍ବରୁ ଗୁରୁବାର ଗସ୍ତ ସୂଚୀ ପରିବର୍ତ୍ତନ କରାଯାଇ ସିଡିଏସ ଲେହ ଆସିବେ ବୋଲି ସ୍ଥିର ହୋଇଥିଲା।
