ମୁମ୍ବାଇ: ଆଉ ନାହାନ୍ତି ବଲିଉଡ ଅଭିନେତା ସୁଶାନ୍ତ ସିଂ ରାଜପୁତ୍ । ମୁମ୍ବାଇ ବାନ୍ଦ୍ରାସ୍ଥିତ ନିଜ ବାସ ଭବନରେ ସେ ଆତ୍ମହତ୍ୟା କରିଛନ୍ତି । ତେବେ ସେ କେଉଁ କାରଣ ପାଇଁ ଆତ୍ମହତ୍ୟା କରିଛନ୍ତି ତା ଏଯାଏଁ ସ୍ପଷ୍ଟ ହୋଇପାରିନାହିଁ । ଏହି ଖବର ତାଙ୍କ ଘରେ କାମ କରୁଥିବା ଚାକର ପୋଲିସକୁ ଫୋନ୍ କରି ଜଣାଇଛନ୍ତି । ଏହାକୁ ନେଇ ବଲିଉଡରେ ଶୋକର ଛାୟା ଖେଳିଯାଇଥିବା ବେଳେ ଚର୍ଚ୍ଚା ମଧ୍ୟ ଜୋର୍ ଧରିଛି । ପୋଲିସକୁ କିଛି ପ୍ରେସକ୍ରିପସନ ମିଳିଛି । ଯେଉଁଥିରେ ସେ ଡିପ୍ରେସନର ଟ୍ରିଟମେଣ୍ଟ ହେଉଥିବା ଆଲୋଚନା ହେଉଛି । ଏପର୍ଯ୍ୟନ୍ତ କୌଣସି ସ୍ପଷ୍ଟ ସୂଚନା ମିଳିନଥିବା ବେଳେ ପୋଲିସ ଘଟଣାସ୍ଥଳରେ ପହଂଚିଛି । ଗତ କିଛି ଦିନ ଧରି ସେ ମାନସିକ ସ୍ତରରେ ଠିକ୍ ନଥିଲେ ବୋଲି କୁହାଯାଉଛି । ଲକ ଡାଉନ ସମୟରେ ବାନ୍ଦ୍ରାରେ ସେ ଏକୁଟିଆ ହିଁ ରହୁଥିଲେ । ବର୍ତ୍ତମାନ ବ୍ୟବଚ୍ଛେଦ ରିପୋର୍ଟ ଆସିବା ପରେ ହିଁ ପ୍ରକୃତ ତଥ୍ୟ ଜଣାପଡିବ ବୋଲି ପୋଲିସ କହିଛି ।
ଏହି ଘଟଣା ପରେ ତାଙ୍କ ସହ ସଂପର୍କରେ ଥିବା ସମସ୍ତେ, ଯେମିତି କି ଫିଲ୍ମ ଜଗତର କେଉଁ ଷ୍ଟାର ହୁଅନ୍ତୁ କିମ୍ବା ଡାଇରେକ୍ଟର କି ପ୍ରଯୋଜକ, ତାଙ୍କ ଘରେ କାମ କରୁଥିବା ସବୁ କର୍ମଚାରୀ ଏବେ ପୋଲିସର ତଦନ୍ତ ପରିସରକୁ ଆସିବେ । ଯେହେତୁ ସେ ଜଣେ ସିଲେବ୍ରିଟି ସେଥିପାଇଁ ପୋଲିସ ଏହାକୁ ଗୁରୁତର ସହ ନେଇ ତଦନ୍ତ କରିବ । ସହଜରେ ଏହି ଘଟଣାକୁ କେହି ବିଶ୍ୱାସ କରିପାରୁନାହାନ୍ତି । ଅନ୍ୟପଟେ ଏହି ଘଟଣା ସୁଶାନ୍ତଙ୍କ ଫ୍ୟାନମାନଙ୍କ ପାଇଁ ନିହାତି ଭାବରେ ଏକ ଦୁଃଖଦ ଘଟଣା ।
୩୪ ବର୍ଷୀୟ ଏହି ୟଙ୍ଗ ଷ୍ଟାର ଜଣକ ଟେଲିଭିଜନ ଦୁନିଆରୁ ନିଜ କ୍ୟାରିଅର ଆରମ୍ଭ କରି ରୋମାଣ୍ଟିକ ଫିଲ୍ମ ‘ଶୁଦ୍ଧ୍ ଦେଶୀ ରୋମାନ୍ସ’ ଫିଲ୍ମ ଜରିଆରେ ବଡ ପରଦାକୁ ଆସିଥିଲେ । ଫିଲ୍ମ ‘ପିକେ’ ରେ ସେ ସପୋର୍ଟିଂ ରୋଲ୍ ରେ ନଜର ଆସିଥିଲେ । ୨୦୧୬ରେ ମୁକ୍ତିଲାଭ କରିଥିବା ‘ଏମଏସ ଧୋନୀ ଦ ଅନଟୋଲ୍ଡ ଷ୍ଟୋରୀ’ ରେ ଦମଦାର କ୍ୟାରେକ୍ଟରରେ ନଜର ଆସିଥିଲେ । ଏହାପରେ ୨୦୧୮ରେ ଫିଲ୍ମ ‘କେଦାରନାଥ’ ଏବଂ ୨୦୧୯ରେ ‘ଛିଛୋରେ’ ଭଳି ଫିଲ୍ମ ତାଙ୍କ ଫ୍ୟାନମାନଙ୍କୁ ଭେଟି ଦେଇଥିଲେ ।
ସୁଶାନ୍ତଙ୍କ ବିୟୋଗରେ ଖାଲି ସିନେ ଜଗତ ନୁହେଁ ବରଂ ରାଜନୀତି ମହଲରେ ବି ଶୋକର ଛାୟା ଖେଳିଯାଇଛି । ରାଷ୍ଟ୍ରପତିଙ୍କ ଠୁ ଆରମ୍ଭ କରି ପ୍ରଧାନମନ୍ତ୍ରୀ ଓ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଶୋକ ପ୍ରକାଶ କରିବା ସହ ତାଙ୍କ ଆତ୍ମାର ସଦଗତି କାମନା କରିଛନ୍ତି ।
ବଲିଉଡ ଅଭିନେତା ସୁଶାନ୍ତ ସିଂ ରାଜପୁତଙ୍କ ଆତ୍ମହତ୍ୟା
