୬ ଲକ୍ଷ ଟଙ୍କାର ବେଆଇନ ଗୁଟ୍‌ଖା ଜବତ

କୁକୁଡ଼ାଖଣ୍ଡି : ସଦର ଥାନା ଅଧିନସ୍ଥ କୁକୁଡ଼ାଖଣ୍ଡି ବ୍ଲକ ଅନ୍ତର୍ଗତ ରୋହିଗାଁର ଏକ ଘରେ ବେଆଇନ ଭାବେ ଚାଲିଥିବା ଏକ ନକଲି ଗୁଟଖା କମ୍ପାନୀ ଉପରେ ପୁଲିସ୍ ଚଢଉ କରିଛି । ସଦର ଥାନା ପୁଲିସର ଏକ ସ୍ୱତନ୍ତ୍ର ଟିମ୍ ଗତକାଲି ରାତିରେ ରୋହିଗାଁ ଗ୍ରାମର ଶେଷ ମୁଣ୍ଡରେ ଥିବା ଏକ ଘରେ ଦୀର୍ଘ ଦିନ ଧରି ଚାଲିଥିବା ବେଆଇନ ଭାବେ ଗୁଟ୍‌ଖା ପ୍ରସ୍ତୁତି କାରଖାନା ଉପରେ ଚଢଉ କରିଥିଲେ । ସଦର ଥାନା ଅଧିକାରୀ ଅନିତା ସାହୁ ପୁଲିସ୍ ଟିମ୍ ସହ ସମ୍ପୃକ୍ତ ଘରେ ଚଢଉ କରିଥିଲେ । ଚଢଉ ବେଳେ ଗୁଟ୍‌ଖା ପ୍ରସ୍ତୁତିରେ ନିୟୋଜିତ ବଳିଆ ଜେନା ନାମକ ଜଣେ ଯୁବକକୁ ଗିରଫ କରିଛି ପୁଲିସ୍ । କିନ୍ତୁ ଗୁଟଖା କମ୍ପାନୀ ମାଲିକ କୁଆଡେ ଫେରାର ହୋଇଥିବା ସୂଚନା ମିଳିଛି । ଉକ୍ତ ଘରୁ ପୁଲିସ ବିଭିନ୍ନ କମ୍ପାନୀର ଗୁଟ୍‌ଖା, ଟୋବାକୋ ପତ୍ର, ଧନିଆ, ପାନମହୁରୀ, ଧଳା ଚୂନ ସହ ବିଭିନ୍ନ ବ୍ରାଣ୍ଡର ଖାଲି ପଲିଥିନ, ରିଲସ୍ ଏବଂ ସିଲେଇ ମେସିନ୍ ସହିତ ପ୍ରାୟ ୬ ଲକ୍ଷ ଟଙ୍କାର ଗୁଟଖା ଜବତ କରିଛି । ଏହି ଘଟଣାରେ ଫେରାର ଥିବା ଗୁଟଖା କମ୍ପାନୀ ମାଲିକଙ୍କ ନାମରେ ପୁଲିସ୍ ମାମଲା ରୁଜୁ କରିଛି ।