ବନ୍ଧଗଡ଼ : ଫିରିଙ୍ଗିଆ ବ୍ଲକ ବନ୍ଧଗଡ଼ ପଞ୍ଚାୟତ ତେଲିମୁଣ୍ଡା ପୋଲ ନିକଟସ୍ଥ ବାଘ ନଦୀରେ ଜଣେ ବୃଦ୍ଧଙ୍କ ମୃତଦେହ ପାଣିରୁ ଉଦ୍ଧାର କରାଯାଇଛି । ମୃତକ ଜଣକ ହେଲେ ତେଲିମୁଣ୍ଡା ସାହିର ସଙ୍କୀର୍ତ୍ତ କହଁର(୫୫) । ମିଳିଥିବା ରିପୋର୍ଟ ମୁତାବକ, ସେ ଗତକାଲି ଦିନ ୨ଟାରୁ ୩ଟା ସମୟରେ ଗାଧୋଇବା ପାଇଁ ନିକଟରେ ଥିବା ବାଘ ନଦୀକୁ ଯାଇ ଘରକୁ ଫେରିନଥିଲେ ।
ଘର ଲୋକେ ବହୁ ଖୋଜାଖୋଜି କରିଥିଲେ ମଧ୍ୟ ତାଙ୍କୁ ନ ପାଇବାରୁ ଆଜି ୪ଟାରେ ସେହି ଅଞ୍ଚଳର କିଛି ଲୋକେ ନଦୀରେ ମୃତଦେହ ଭାସୁଥିବା ଦେଖିବାକୁ ପାଇଥିଲେ । ଚିହ୍ନଟ ପରେ ପରିବାରକୁ ଖବର ଦେବାରୁ ସେମାନେ ଘଟଣାସ୍ଥଳକୁ ଯାଇ ଫିରିଙ୍ଗିଆ ଦମକଳ ବାହିନୀକୁ ଜଣାଇବା ସହ ଫିରିଙ୍ଗିଆ ଥାନାରେ ଜଣାଇଥିଲେ । ପରେ ଘଟଣାସ୍ଥଳରେ ଦମକଳ ବାହିନୀ ପହଞ୍ଚି ଶବକୁ ଉଦ୍ଧାର କରିଥିଲା ଏବଂ ପୁଲିସ ପହଞ୍ଚି ଫିରିଙ୍ଗିଆ ଥାନାରେ ଏକ ଅପମୃତ୍ୟୁ ମାମଲା ରୁଜୁ କରିବା ସହ ଶବକୁ ବ୍ୟବଚ୍ଛେଦ କରିବା ପାଇଁ ଜିଲ୍ଲା ସ୍ୱାସ୍ଥ୍ୟକେନ୍ଦ୍ର ଫୁଲବାଣୀକୁ ପଠାଇଥିଲା । ଘଟଣାର ଅଧିକ ତଦନ୍ତ ଚାଲୁ ରହିଥିବା ନେଇ ଫିରିଙ୍ଗିଆ ଥାନାଧିକାରୀ ତପନ କୁମାର ନାହାକ ସୂଚନା ଦେଇଛନ୍ତି ।
