ଯୁବକର ମୃତଦେହ ଉଦ୍ଧାର: ସନ୍ଦେହଘେରରେ ଯୁବକଙ୍କ ମୃତ୍ୟୁ

କୁକୁଡାଖଣ୍ଡି : ସଦର ଥାନା ପୁଲିସ ବାଇଗଣବାଡ଼ି ନିକଟ କାଜୁତୋଟାରୁ ଜଣେ ଯୁବକଙ୍କ ମୃତଦେହ ସହ ଏକ ପଲ୍‌ସର୍ ବାଇକକୁ ଉଦ୍ଧାର କରିଛି । ମୃତ ଯୁବକ ଜଣକ ବଉଳଝୋଳି ଅଞ୍ଚଳର ନିରଞ୍ଜନ ବିଶୋଇଙ୍କ ପୁଅ ଉମାଚରଣ ବିଶୋଇ(୨୬) ବୋଲି ଜଣାପଡିଛି । ତାଙ୍କ ମୃତ୍ୟୁ ସନ୍ଦେହଘେରରେ ରହିଛି । ସେ ଆତ୍ମହତ୍ୟା କରିଛନ୍ତି ନା ତାଙ୍କୁ କେହି ହତ୍ୟା କରିଛି ସେନେଇ ପୁଲିସ୍ ତଦନ୍ତ କରୁଛି । ମିଳିଥିବା ସୂଚନା ପ୍ରକାରେ ଉମାଚରଣ ବାଇଗଣବାଡି ଅଞ୍ଚଳର ଜଣେ ନାବାଳିକାକୁ ପ୍ରେମ କରୁଥିଲେ । ଉଭୟ ଗତକାଲି ରାତିରେ ଘରୁ ବାହାରିଥିଲେ । କିନ୍ତୁ ଯୁବକଙ୍କ ମୃତ୍ୟୁ ହେବା ନେଇ ନାବାଳିକା ଜଣକ ଯୁବକଙ୍କ ପରିବାର ଲୋକଙ୍କୁ ଘଟଣା ସମ୍ପର୍କରେ କହିଥିଲେ । ଉମାଚରଣଙ୍କ ଦେହରେ କୌଣସି କ୍ଷତ ଚି଼ହ୍ନ ନଥିବା ବେଳେ ତାଙ୍କ ମୃତ୍ୟୁ କେମେତି ହେଲା ତାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି । ଅନ୍ୟପକ୍ଷରେ ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ଜଣାପଡିବ ବୋଲି ପୁଲିସ୍ କହିଛି । ସଦର ଥାନା ପୁଲିସ୍ ଏକ ମାମଲା ରୁଜୁ କରିଛି । ଏସଆଇ ପବିତ୍ର ମୋହନ ଦଳାଇ ଘଟଣାର ତଦନ୍ତ କରୁଥିବା ଥାନା ଅଧିକାରୀ ମହେନ୍ଦ୍ର ସାହୁ ସୂଚନା ଦେଇଛନ୍ତି ।