ଯୁବତୀଙ୍କ ଫଟୋ ଭାଇରାଲ୍ କରି ମହାରାଷ୍ଟ୍ରର ଯୁବକ ଗିରଫ

ବ୍ରହ୍ମପୁର: ଜଣେ ଯୁବତୀଙ୍କ ଫଟୋ ସାମାଜିକ ଗଣମାଧ୍ୟମରେ ଭାଇରାଲ୍ କରିବା ଅଭିଯୋଗରେ ବୈଦ୍ୟନାଥପୁର ଥାନା ପୋଲିସ ଜଣେ ଯୁବକଙ୍କୁ ଗିରଫ କରିଛି । ଅଭିଯୁକ୍ତ ଜଣଙ୍କ ହେଲେ ମହରାଷ୍ଟ୍ରର ଦ୍ୟାନେଶ୍ୱର ବାଲ୍ମୀକି ବୋଏନେ (୩୨) ବୋଲି ପୋଲିସ କହିଛି । ଅଭିଯୁକ୍ତକୁ କୋର୍ଟ ଚାଲାଣ କରିଥିବା ଜଣାପଡ଼ିଛି । ସୂଚପାଯୋଗ୍ୟ ଯେ କିଛି ବର୍ଷ ତଳେ ଯୁବତୀ ଓ ଅଭିଯୁକ୍ତ ଦ୍ୟାନେଶ୍ୱର ଏକ କମ୍ପାନୀରେ ମିଳିମିଶି କାମ କରୁଥିଲେ । ସେଠାରେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢ଼ି ଉଠିଥିଲା । କୌଣସି କାରଣରୁ ଯୁବତୀ ଜଣଙ୍କ ଦ୍ୟାନେଶ୍ୱରଙ୍କ ସହ ସମ୍ପର୍କ ରଖିବାକୁ ମନା କରି ଦେଇଥିଲେ । ଏହା ପରେ ଅଭିଯୁକ୍ତ ଦ୍ୟାନେଶ୍ୱର ସଂପୃକ୍ତ ଯୁବତୀଙ୍କ ଅଶ୍ଳୀଳ ଫଟୋକୁ ନିକଟ ସମ୍ପର୍କୀୟଙ୍କୁ ପଠାଇଥିଲା । ଏହା ସହ ଅଭିଯୁକ୍ତ ଦ୍ୟାନେଶ୍ୱର ଗତ ଶନିବାର ବ୍ରହ୍ମପୁରକୁ ଆସି ଯୁବତୀଙ୍କୁ ଭେଟିବା ପାଇଁ ତାଙ୍କ ପିଛା କରିଥିଲେ । ଏହାକୁ ନେଇ ଯୁବତୀ ବାରଣ କରିଥିଲେ । ଶେଷରେ ଘଟଣା ସମ୍ପର୍କରେ ଯୁବତୀ ଜଣଙ୍କ ବୈଦ୍ୟନାଥପୁର ଥାନାରେ ଅଭିଯୋଗ କରିଥିଲେ । ତାଙ୍କ ଅଭିଯୋଗ ଆଧାରରେ ପୋଲିସ ଥାନାରେ ଏକ ମାମଲା ରୁଜୁ କରି ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଥିଲା ।