ମହିଳା ଟ୍ରାଫିକ୍ କନଷ୍ଟେବଳଙ୍କୁ ଦୁର୍ବ୍ୟବହାର, ଯୁବକ ଗିରଫ

ଭୁବନେଶ୍ୱର: ଡ୍ୟୁଟିରେ ଥିବାବେଳେ ଦୁଇମହିଳା କନ୍‌ଷ୍ଟେବଳଙ୍କୁ ଦୁର୍ବ୍ୟବହାର କରିଥିବା ଅଭିଯୋଗରେ ଚନ୍ଦ୍ରଶେଖରପୁର ଥାନା ପୁଲିସ ଜଣେ ଯୁବକଙ୍କୁ ଗିରଫ କରି ମଙ୍ଗଳବାର କୋର୍ଟ ଚାଲାଣ କରିଛି । ଗିରଫ ଅଭିଯୁକ୍ତ ଜଣକ ହେଲେ କନ୍ଧମାଳ ଟିକନବାଲି ଥାନା ଅନ୍ତର୍ଗତ ବସ୍ତିଙ୍ଗିଆ ଗ୍ରାମର ଆଶିଷ ଦିଗଲ(୨୪) । ସେ ଏଠାରେ ଆଚାର୍ଯ୍ୟବିହାର ନିକଟରେ ରହୁଥିଲେ । ସୂଚନା ଅନୁଯାୟୀ, ସୋମବାର ଅପରାହ୍ଣ ବେଳେ ମହିଳା ଟ୍ରାଫିକ୍ କନଷ୍ଟେବଳ ସୁନିତା ଭୋଇ ଏବଂ ଚିନ୍ମୟୀ ପ୍ରଧାନ ଚନ୍ଦ୍ରଶେଖରପୁର ଥାନା ଜାଭିଅର୍ ଛକରେ ଡ୍ୟୁଟି କରୁଥିଲେ । ଏହି ସମୟରେ ଆଶିଷ ସେଠାକୁ ଆସି ପ୍ରାୟ ୧ଘଣ୍ଟା ସମୟ ଧରି ତାଙ୍କୁ କମେଣ୍ଟ କରିଥିଲେ । ଉଭୟେ ଆଶିଷଙ୍କୁ ବିରୋଧ କରିବାରୁ ସେ ପଳାଇ ଯାଇଥିଲେ । ପୁଣି କିଛି ସମୟ ପରେ ଆଶିିସଷ ସେଠାକୁ ଆସି ସୁନିତା ଓ ଚିନ୍ମୟୀଙ୍କୁ ଦୁର୍ବ୍ୟବହାର କରିଥିଲେ । ଉଭୟେ ତାଙ୍କୁ କାବୁ କରିବାକୁ ଚେଷ୍ଟା କରିଥିଲେ । ଏହି ସମୟରେ ଟ୍ରାଫିକ୍ ଜାମ ହୋଇଯିବାରୁ ଆଶିଷ ସେଠାରୁ ଖସି ଯାଇପାରିନଥିଲେ । ତେଣୁ ସୁନିତା ଓ ଚିନ୍ମୟୀ ତାଙ୍କୁ କାବୁ କରି ପିସିଆର୍‌କୁ ଖବର ଦେଇଥିଲେ । ସୁନିତାଙ୍କ ଅଭିଯୋଗକ୍ରମେ ପୁଲିସ ଏକ ମାମଲା ରୁଜୁ କରି ତଦନ୍ତ କରିଥିଲା ।