ଧର୍ମଶାଳା : ଧର୍ମଶାଳା ବ୍ଲକ ଜେନାପୁର ଥାନା ଅନ୍ତର୍ଗତ ଚଢ଼େଇଧରା ଗ୍ରାମର ଜନୈକା ଯୁବତୀଙ୍କୁ ପୁରୀ ବଡ଼ଶଙ୍ଖ ଅଞ୍ଚଳର ଜଣେ ମହିଳା ଅର୍ଥ ପ୍ରଲୋଭନ ଦେଖାଇ ଉତ୍ତରପ୍ରଦେଶ ନେଇଯାଇଥିଲେ । ସେଠାରେ ତାଙ୍କୁ ନାଚ ଗୀତରେ ନିୟୋଜିତ କରିଥିଲେ । ଯୁବତୀଙ୍କୁ ସେଠାରେ ନିର୍ଯାତନା ଦେବା ଘଟଣା ପରିବାର ଲୋକେ ଜାଣିବା ପରେ ଏ ନେଇ ଜେନାପୁର ଥାନାରେ ଅଭିଯୋଗ କରିଥିଲେ । ଜେନାପୁର ପୁଲିସ ଏକ ମାମଲା ରୁଜୁ କରି ଯୁବତୀଙ୍କୁ ଉଦ୍ଧାର କରିବା ସହ ଅଭିଯୁକ୍ତକୁ ଗିରଫ କରି କୋର୍ଟଚାଲାଣ କରିଛି ।
ପୁରୀ ବଡଶଙ୍ଖ ଗ୍ରାମର ସ୍ୱାଗତିକା ମହାନ୍ତି ଜାନୁଆରୀ ୩୧ତାରିଖରେ ଚଢ଼େଇଧରା ଅଞ୍ଚଳର ଜନୈକା ଯୁବତୀଙ୍କୁ ଅର୍ଥ ପ୍ରଲୋଭନ ଦେଖାଇ ଉତ୍ତରପ୍ରଦେଶର ବାଲିଆଠାରେ ରଖି ନାଚଗୀତରେ ନିୟୋଜିତ କରାଇଥିଲେ । ଝିଅଠୁ ଖବର ପାଇବା ପରେ ବାପା ବାବୁଲି ନାୟକ ଥାନାରେ ଅଭିଯୋଗ କରିଥିଲେ । ପୁଲିସ ଯୁବତୀଙ୍କୁ ରବିବାର ଉଦ୍ଧାର କରି ପରିବାର ଲୋକଙ୍କୁ ହସ୍ତାନ୍ତର କରିଥିବାବେଳେ ସ୍ୱାଗତିକାଙ୍କୁ ଗିରଫ କରି ସୋମବାର କୋର୍ଟଚାଲାଣ କରିଛି ।
