ଦାରିଙ୍ଗବାଡ଼ି: ନାତୁଣୀକୁ ଦେଖି ଘରକୁ ଫେରୁଥିଲେ ଅଜା ଆଈ । ହେଲେ ଅଧା ରାସ୍ତାରେ ଗୋଟିଏ କାର ତାଙ୍କୁ ଧକ୍କା ଦେବା ଫଳରେ ଚାଲିଗଲା ଅଜା ଆଈଙ୍କ ଜୀବନ । ଏଭଳି ଅଭାବନୀୟ ଘଟଣା କନ୍ଧମାଳ ଜିଲ୍ଲା ଦାରିଙ୍ଗବାଡ଼ି ଥାନା କିରିକୁଟି ଠାରେ ଦେଖିବାକୁ ମିଳିଛି । ଆଉ ମୃତକ ହେଲେ କୁମ୍ଭାରମୁଣ୍ଡା କଲୋନି ସାହିର କାମଦେବ ଦିଗାଳ ଓ ବିବିକା ଦିଗାଳ ।
ଉଭୟ ଅଜା ଆଈ ଲୁନା ଯୋଗେ ବାଲିଗୁଡା ଯାଇ ନାତୁଣୀକୁ ଦେଖି ଗାଁକୁ ଫେରୁଥିବା ସମୟରେ କିରିକୁଟି ବ୍ରିଜରେ ସାମ୍ନା ପଟୁ ଏକ କାର ତାଙ୍କୁ ଧକ୍କା ଦେଇଥିଲା । ଆଉ ଏହି ଦୁର୍ଘଟଣାରେ ଗୁରୁତର ଆହତ ହୋଇଥିବା ଅଜା ଆଈଙ୍କୁ ଦାରିଙ୍ଗବାଡ଼ି ହସ୍ପିଟାଲରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଅନ୍ୟପଟେ ଦାରିଙ୍ଗବାଡ଼ି ପୋଲିସ ଦୁର୍ଘଟଣା ଘଟାଇଥିବା କାରକୁ ଜବତ କରିବା ସହ ଡ୍ରାଇଭରକୁ ଅଟକ ରଖି ଅଧିକ ତଦନ୍ତ ଚଳାଇଛି ।ଦୁର୍ଘଟଣାରେ ଏକା ସାଙ୍ଗରେ ଅଜା ଆଈଙ୍କ ମୃତ୍ୟୁ ଘଟିବା ପରେ ପରିବାର ଲୋକେ ମ୍ରିୟମାଣ ହୋଇପଡିଛନ୍ତି ।
