‘ଅଙ୍କୁର’ ପାଇଁ ସେ ପାଇଥିଲେ ଜାତୀୟ ଫିଲ୍ମ ପୁରସ୍କାର
‘ଅଭିମାନ’ ଥିଲା ନିର୍ଦ୍ଦେଶକ ଭାବେ ତାଙ୍କର ପ୍ରଥମ ଫିଲ୍ମ
୨୦୧୭ ମସିହାରେ ପଦ୍ମଶ୍ରୀ ସମ୍ମାନରେ ସମ୍ମାନିତ
ଭୁବନେଶ୍ୱର: ବର୍ଷିୟାନ ଚଳଚ୍ଚିତ୍ର ଅଭିନେତା ସାଧୁ ମେହେରଙ୍କ ପରଲୋକ ଘଟିଛି । ମୃତ୍ୟୁବେଳକୁ ତାଙ୍କୁ ୮୪ ବର୍ଷ ହୋଇଥିଲା । ତାଙ୍କର ପରଲୋକ ମୁମ୍ବାଇର ଏକ ଘରୋଇ ହସ୍ପପିଟାଲରେ ହୋଇଥିବା ନେଇ ଫିଲ୍ମ ନିର୍ଦ୍ଦେଶକ ସବ୍ୟସାଚୀ ମହାପାତ୍ର ସୂଚନା ଦେଇଛନ୍ତି । ସାଧୁ ମେହେର ଥିଲେ ସମାନ୍ତରାଳ ସିନେମାର ସନ୍ଥ । ଗୁରୁ ଗମ୍ଭୀର ଥିଲା ତାଙ୍କ ସ୍ୱର । ଅଭିନୟ ଏମିତି, ଯାହା ସିଧା ହୃଦୟକୁ ସ୍ପର୍ଶ କରୁଥିଲା । ପ୍ରଥମ ଓଡ଼ିଆ ଅଭିନେତା ଯିଏ ବଳିଷ୍ଠ ଅଭିନୟ ପାଇଁ ପାଇଥିଲେ ‘ଜାତୀୟ ସମ୍ମାନ’ । ଓଡ଼ିଆ ଫିଲ୍ମକୁ ସର୍ବଭାରତୀୟ ସ୍ତରରେ ପହଞ୍ଚାଇବାର ଶ୍ରେୟ ତାଙ୍କୁ ଦିଆଯାଏ । ବଳିଷ୍ଠ ଅଭିନୟ ଓ ଦମଦାର ସ୍ୱର ପାଇଁ ପରିଚିତ ସାଧୁ ମେହରଙ୍କ ଜୀବନ ଯାତ୍ରା ଶୁକ୍ରବାର ଶେଷ ହୋଇଛି ।
ଦୁନିଆ ରଙ୍ଗମଞ୍ଚରେ ନିଜ ଅଭିନୟ ସାରି ସେ ଚାଲି ଯାଇଛନ୍ତି । ପଛରେ ଛାଡ଼ି ଯାଇଛନ୍ତି ଉପଲବ୍ଧିର ପାହାଡ଼ । ଯାହା ଆଗକୁ ପ୍ରେରଣା ଦେବ ଯୁବ କଳାକାର ମାନଙ୍କୁ । ୧୯୮୦ ଦଶକରେ ପାରାଲାଲ ସିନେମାର ଗୋଟିଏ ଚିହ୍ନା ନାମ ଥିଲେ ସାଧୁ ମେହର । ୧୯୭୪ ମସିହାରେ ‘ଅଙ୍କୁର’ ପାଇଁ ସେ ପାଇଥିଲେ ଜାତୀୟ ଫିଲ୍ମ ପୁରସ୍କାର । ଏଭଳି ସମ୍ମାନ ପାଇବାର ସେ ଥିଲେ ପ୍ରଥମ ଓଡ଼ିଆ । ‘ଅଙ୍କୁର’ ତାଙ୍କୁ ପରିଚୟ ଦେବାର ୩ ବର୍ଷ ପରେ ସେ ଅଭିମାନ ଜରିଆରେ ପାଦ ଥାପିଥିଲେ ନିର୍ଦ୍ଦେଶନାରେ । ‘ଅଭିମାନ’ ଥିଲା ନିର୍ଦ୍ଦେଶକ ଭାବେ ତାଙ୍କର ପ୍ରଥମ ଫିଲ୍ମ । ଏହାକୁ ଆଜି ମଧ୍ୟ ଏକ କଲ୍ଟ କ୍ଲାସିକ୍ ଭାବେ ବିବେଚନା କରାଯାଏ । ୧୯୮୦ ଦଶକରେ ଓଡ଼ିଆ ଫିଲ୍ମ ଶିଳ୍ପ ଯେତେବେଳେ ମସଲା ମୋଭି’ରେ ବ୍ୟସ୍ତ ଥିଲା ସେତେବେଳେ ସାଧୁ ଲିକ୍ରୁ ହଟି ଓଡ଼ିଶାକୁ ଦେଇଥିଲେ ପ୍ରଥମ ସାଇନ୍ସ ଫିକ୍ସନ ଫିଲ୍ମ । ଫିଲ୍ମର ନାଁ ଥିଲା ‘ବାବୁଲା’ ।
ବିଶିଷ୍ଟ ଚଳଚ୍ଚିତ୍ର ଅଭିନେତା ତଥା ନିର୍ଦ୍ଦେଶକ ସାଧୁ ମେହେରଙ୍କ ଦେହାନ୍ତ ବିଷୟରେ ଜାଣି ମୁଁ ଦୁଃଖିତ। ନିଖୁଣ ଅଭିନୟ ଦ୍ୱାରା ସେ ଉଭୟ ଓଡ଼ିଆ ଓ ହିନ୍ଦୀ ଚଳଚ୍ଚିତ୍ରରେ ନିଜର ସ୍ୱତନ୍ତ୍ର ଛାପ ଛାଡ଼ିଯାଇଛନ୍ତି। ସେ ହେଉଛନ୍ତି ଜାତୀୟ ଚଳଚ୍ଚିତ୍ର ପୁରସ୍କାରରେ ସମ୍ମାନିତ ହୋଇଥିବା ପ୍ରଥମ ଓଡ଼ିଆ ଅଭିନେତା। ତାଙ୍କ ବିୟୋଗ କଳା ଜଗତ ପାଇଁ…
— Naveen Patnaik (@Naveen_Odisha) February 2, 2024
୧୯୮୫ରେ ଆସିଥିବା ଏହି ଫିଲ୍ମ ତା’ ସମୟଠାରୁ ଢେର ଆଗରେ ଥିଲା । ଫଳରେ ଫିଲ୍ମ ଚାଲି ନଥିଲା । କିନ୍ତୁ ଗୋଟିଏ କଥା ପ୍ରମାଣିତ କରିଥିଲା, ସାଧୁ ନିଜ ସମୟଠାରୁ ଆଗରେ ଥିଲେ । ୧୯୬୯ରେ ଭୁବନସୋମ୍ ଜରିଆରେ ସାଧୁ ଫିଲ୍ମ ଦୁନିଆକୁ ପ୍ରଥମେ ପ୍ରବେଶ କରିଥିଲେ । ପାଖାପାଖି ୬ ଦଶକର ଅଭିନୟ ଯାତ୍ରାରେ ସେ ପ୍ରାୟ ୨୭ ଫିଲ୍ମରେ ଅଭିନୟ କରିଥିଲେ ଓ ୫ ଫିଲ୍ମର ନିର୍ଦ୍ଦେଶନା ଦେଇଥିଲେ । ‘ଅଭିମାନ’ ନିର୍ଦ୍ଦେଶନାର ୨୦ ବର୍ଷ ପରେ ୧୯୯୫ରେ ଶେଷ ଥର ପାଇଁ ‘ଗୋପରେ ବଢୁଛି କଳା କହ୍ନେଇ’ ଫିଲ୍ମର ନିର୍ଦ୍ଦେଶନା ଦେଇଥିଲେ । ତାଙ୍କ ଅଭିନୟର ଯାଦୁ ଦର୍ଶକମାନଙ୍କୁ ବାନ୍ଧି ରଖୁଥିଲା । ଅନେକ ହିନ୍ଦୀ ଓ ଓଡ଼ିଆ ସିନେମା ମଧ୍ୟରେ ‘ଅଙ୍କୁର’, ‘ମୃଗୟା’, ‘ଭୁବନ ସୋମ୍’, ‘ମନ୍ଥନ’ରେ ସାଧୁଙ୍କ ନିଖୁଣ ଅଭିନୟର ଛାପ ଦେଖିବାକୁ ମିଳିଥିଲା । ଫିଲ୍ମ ପ୍ରତି ତାଙ୍କର ଅବଦାନ ପାଇଁ ୨୦୧୭ ମସିହାରେ କେନ୍ଦ୍ର ସରକାର ତାଙ୍କୁ ପଦ୍ମଶ୍ରୀ ସମ୍ମାନରେ ସମ୍ମାନିତ କରିଥିଲେ ।
