ଭୁବନେଶ୍ୱର: ବିଜେବି କଲେଜ ଛାତ୍ରୀ ରୁଚିକା ମହାନ୍ତି ଆତ୍ମହତ୍ୟା ଘଟଣା ଉପରୁ ପରଦା ଉଠିନଥିବାବେଳେ ଏବେ ଉତ୍କଳ ସଙ୍ଗୀତ ମହାବିଦ୍ୟାଳୟର ଜଣେ ଛାତ୍ରୀ ନିଖୋଜ ହେବା ଘଟଣା ସାମ୍ନାକୁ ଆସିଛି । ସମ୍ପୃକ୍ତ ଛାତ୍ରୀ ଜଣକ ଯୁକ୍ତତିନି ପ୍ରଥମବର୍ଷରେ ପଢୁଛନ୍ତି । ଗତ ଶନିବାର ଠାରୁ ସେ ନିଖୋଜ ହୋଇଯାଇଥିବା ନେଇ ତାଙ୍କ ବାପା ଆଜି କ୍ୟାପିଟାଲ ଥାନାରେ ଏତଲା ଦେଇଛନ୍ତି । ଅଭିଯୋଗକୁ ଭିତ୍ତି କରି ପୁଲିସ ତଦନ୍ତ ଚଳାଇଛି । ଅଭିଯୋଗ ଅନୁସାରେ, ସମ୍ପୃକ୍ତ ଛାତ୍ରୀ ଜଣକ ଉତ୍କଳ ସଙ୍ଗୀତ ମହାବିଦ୍ୟାଳୟର ହଷ୍ଟେଲରେ ଯୁକ୍ତଦୁଇ ପଢ଼ିବାବେଳୁ ରହୁଛନ୍ତି । ଜୟଦେବ ବିହାରରେ ତାଙ୍କର ମାମୁଁ ତଥା ସ୍ଥାନୀୟ ଅଭିଭାବକ ରୁହନ୍ତି ।
ଗତ ରବିବାର ସକାଳ ୧୦ଟା ସମୟରେ ମାମୁଁ ତାଙ୍କ ଭାଣେଜିକୁ ଦେଖା କରିବାକୁ ଯାଇଥିଲେ । ହେଲେ ସେ ତାଙ୍କ ମାମୁଁଙ୍କ ସହ ଶୁକ୍ରବାର ୪ଟା ବେଳଠୁ ପଳାଇଥିବା ହଷ୍ଟେଲ ୱାର୍ଡେନ କହିଥିଲେ । ଏହାଶୁଣି ମାମୁଁ ଆଶ୍ଚର୍ଯ୍ୟ ହୋଇଯାଇଥିଲେ । ସେ ହଷ୍ଟେଲ ଆସିନଥିବାବେଳେ ଭାଣେଜିକୁ କିଏ ନେଲା ବୋଲି ପ୍ରଶ୍ନ କରିଥିଲେ । ଶେଷରେ ଛାତ୍ରୀଙ୍କ ବାପା ଏନେଇ ଥାନାରେ ଏତଲା ଦେଇଛନ୍ତି । ଏଥିସହ ଝିଅ ନିଖୋଜ ହେବା ପାଇଁ ହଷ୍ଟେଲ ସୁପରିଟେଣ୍ଡେଣ୍ଟ୍ଙ୍କୁ ଦାୟୀ କରିଛନ୍ତି ।
ଅନ୍ୟପଟେ ହଷ୍ଟେଲ କର୍ତ୍ତୃପକ୍ଷ କହିଛନ୍ତି ଯେ, କିଛି ଦିନ ତଳେ ଛାତ୍ରୀଙ୍କ ଦେହ ଖରାପ ଥିଲା । ନିଖୋଜ ଦିନ କଲେଜ ଯାଇଥିଲେ । କିନ୍ତୁ ଆଉ ହଷ୍ଟେଲ ଫେରିନଥିଲେ । ରେଜିଷ୍ଟ୍ରାରରେ କିନ୍ତୁ ଅଲଗା ଲେଖାଥିଲା । ଲେଖାଥିଲା ଏମିତି କି ‘ମୁଁ ମୋର ଭାଣେଜୀକୁ ତାର ଦେହ ଅସୁସ୍ଥ ପାଇଁ ତା’ର ଘରକୁ ନେଉଛି’ । ଯାହା ଛାତ୍ରୀ ଜଣକ ନିଜେ ମାମୁଁଙ୍କ ନକଲି ଦସ୍ତଖତ କରିଥିବା କର୍ତ୍ତୃପକ୍ଷ କହିଛନ୍ତି ।
