ଜାମଗାଁ : ବାଇକ୍କୁ ଧକ୍କା ଦେଲା ଅଜଣା ଗାଡି। ସ୍ତ୍ରୀ ମୃତ ସ୍ଵାମୀ ଗୁରୁତର। ୪୯ ନମ୍ବର ଜାତୀୟ ରାଜପଥ କୁହାକୁଣ୍ଡା ଛକରେ ଆଜି ଏଭଳି ମର୍ମନ୍ତୁଦ ଦୁର୍ଘଟଣା ଘଟିଛି। ସ୍ୱାମୀଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଲଖନପୁର ଗୋଷ୍ଠି ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି।
ସୂଚନାନୁଯାୟୀ, ମଙ୍ଗଳବାର ପୂର୍ବାହ୍ନ ପ୍ରାୟ ୧୧ ଟା ବେଳେ ବାଦୀମାଲ ପଞ୍ଚାୟତ ବଡ଼ଧରା ଗ୍ରାମର ଛବିଲ ଭୋଇ(୩୮ ବର୍ଷ) ଓ ତାଙ୍କ ସ୍ତ୍ରୀ ଜୟନ୍ତୀ ଭୋଇ (୩୨ ବର୍ଷ) ସିଜି ୧୩ ଏଏଲ ୧୯୯୮ ନମ୍ବର ବିଶିଷ୍ଟ ଏକ ବାଇକ୍ ଯୋଗେ ଛତିଶଗଡ଼ ରାୟଗଡ ଜିଲ୍ଲା ଅନ୍ତର୍ଗତ ବେନ୍ଦେରାଚୁଆଁ ଗ୍ରାମରେ ମନ୍ଦିର ପ୍ରତିଷ୍ଠା ଉତ୍ସବ ଦେଖିବା ପାଇଁ ଘରୁ ବାହାରି ଥିଲେ। ସେମାନେ କନକତୋରା ବାଳାଜୀ ପେଟ୍ରୋଲ ପମ୍ପରେ ଗାଡିରେ ତେଲ ପକାଇ ଯାଉଥିବା ବେଳେ କୁହାକୁଣ୍ଡା ଛକରେ ଝାରସୁଗୁଡା ପଟୁ ଯାଉଥିବା ଏକ ଅଜଣା ଗାଡ଼ି ତାଙ୍କୁ ଧକ୍କା ମାରି ଫେରାର ହୋଇଯାଇଛି। ଫଳରେ ଘଟଣାସ୍ଥଳରେ ସ୍ତ୍ରୀ ଜୟନ୍ତୀଙ୍କ ମୃତ୍ୟୁ ହୋଇଥିବା ବେଳେ ସ୍ୱାମୀ ଛବିଲ ଗୁରୁତର ଆହତ ହୋଇଛନ୍ତି। ତାଙ୍କୁ ଆମ୍ବୁଲାନ୍ସ ଯୋଗେ ଲଖନପୁର ଗୋଷ୍ଠି ସ୍ୱାସ୍ଥ୍ୟକେନ୍ଦ୍ରକୁ ନିଆ ଯାଇଥିବା ରେଙ୍ଗାଲି ଥାନା ଅଧିକାରୀ କ୍ରେସେନସିଆ ସାମେରିଆ ସୂଚନା ଦେଇଛନ୍ତି।
ଏହି ଦୁର୍ଘଟଣା ପରେ ସ୍ଥାନୀୟ ଲୋକେ ବିଭିନ୍ନ ଦାବିକୁ ନେଇ ରାସ୍ତା ଅବରୋଧ କରିଛନ୍ତି । ଘଟଣାସ୍ଥଳରେ ରେଙ୍ଗାଲି ଥାନା ଅଧିକାରୀ କ୍ରେସେନସିଆ ସାମେରିଆ, ଲଖନପୁର ଥାନା ଅଧିକାରୀ ସନ୍ଧ୍ୟାରାଣୀ ଜେନାଙ୍କ ନେତୃତ୍ୱରେ ପୋଲିସ ଫୋର୍ସ ମୁତୟନ ହୋଇଛନ୍ତି। ଖବର ଲେଖା ହେବା ପର୍ୟ୍ୟନ୍ତ ରାସ୍ତା ଅବରୋଧ ଜାରି ରହିଛି ।
