ନ୍ୟୁୟର୍କ: ୨୦୧୬ ରାଷ୍ଟ୍ରପତି ନିର୍ବାଚନ ପୂର୍ବରୁ ଜଣେ ପର୍ନଷ୍ଟାର୍ଙ୍କୁ କଥିତ ରୂପେ ଲୁଚାଇ ଅର୍ଥ ଦେଇଥିବା ମାମଲାରେ ମଙ୍ଗଳବାର ତାଙ୍କୁ ଗିରଫ କରାଯାଇପାରେ ବୋଲି ପୂର୍ବତନ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଆଶଙ୍କା ବ୍ୟକ୍ତ କରିଛନ୍ତି । ଏହାର ବିରୋଧ କରିବାକୁ ଟ୍ରମ୍ପ୍ ତାଙ୍କର ସମର୍ଥକମାନଙ୍କୁ ଆହ୍ୱାନ କରିଛନ୍ତି । ଟ୍ରମ୍ପ୍ ଶନିବାର ସକାଳେ ନିଜର ଟ୍ରୁଥ୍ ସୋସିଆଲ୍ ପ୍ଲାଟ୍ଫର୍ମରେ ଏହି ଗିରଫ ଆଶଙ୍କା ବ୍ୟକ୍ତ କରିବା ସହିତ ସମର୍ଥକଙ୍କୁ ଆହ୍ୱାନ କରିଛନ୍ତି ।
ସୂଚନାଯୋଗ୍ୟ, ଟମ୍ପ୍ଙ୍କର ସମ୍ପୃକ୍ତ ପର୍ନଷ୍ଟାର୍ ଷ୍ଟର୍ମି ଡାନିଏଲ୍ସ (ଅସଲି ନାମ ଷ୍ଟେଫାନୀ କ୍ଲିଫୋର୍ଡ)ଙ୍କ ସହିତ ବହୁବର୍ଷ ପୂର୍ବେ ସମ୍ବନ୍ଧ ଥିଲା । ୨୦୧୬ ନିର୍ବାଚନ ପୂର୍ବରୁ ଏହି ସମ୍ବନ୍ଧକୁ ସାର୍ବଜନୀନ ନକରିବା ପାଇଁ ଟ୍ରମ୍ପ୍ ତାଙ୍କୁ ୧.୩୦ ଲକ୍ଷ ଡଲାର ଦେଇଥିଲେ । ଏହି ମାମଲାରେ ଟ୍ରମ୍ପ୍ଙ୍କ ବିରୋଧରେ ମୋକଦ୍ଦମା କରିବା ନେଇ ପୀଡ଼ିତ ପକ୍ଷ ବିଚାର କରୁଛନ୍ତି । ଟ୍ରମ୍ପ୍ଙ୍କ ଓକିଲ ଶୁକ୍ରବାର ସନ୍ଧ୍ୟାରେ ସଏନ୍ବିସିକୁ କହିଥିଲେ, ଯଦି ମ୍ୟାନ୍ହଟ୍ଟନ୍ ଗ୍ରାଣ୍ଡ୍ ଜୁରୀ ଦ୍ୱାରା ଟ୍ରମ୍ପ ଦୋଷୀ ସାବ୍ୟସ୍ତ ହୁଅନ୍ତି ତେବେ ଅପରାଧିକ ଅଭିଯୋଗର ସାମ୍ନା କରିବା ପାଇଁ ସେ ଆତ୍ମସମର୍ପଣ କରିବେ ।
