କେନ୍ଦୁଝର : କେନ୍ଦୁଝର ବନଖଣ୍ଡ ତେଲକୋଇ ବନାଞ୍ଚଳରେ ବିଦ୍ୟୁତ୍ ହୁକ ପକାଇ ଦନ୍ତାହାତୀକୁ ହତ୍ୟା କରିଛନ୍ତି ଦୁର୍ବୃତ୍ତ । ଧାନବିଲରୁ ମିଳିଛି ଦନ୍ତାହାତୀର ମୃତଦେହ । ବ୍ୟବଚ୍ଛେଦ ପରେ ସାମ୍ନାକୁ ଆସିଛି ସତ । ନିକଟସ୍ଥ ଜଙ୍ଗଲରୁ ଏନେଇ ମିଳିଛି ପ୍ରମାଣ । ତେଲକୋଇ ବନାଞ୍ଚଳ ଗୋଳାବନ୍ଧ ସେକ୍ସନ୍ ସଲେଇକେନା ପଞ୍ଚାୟତ ଭାଡିମରା ଜୁଆଙ୍ଗ ସାହିରେ ଏକ ଧାନବିଲ ମଧ୍ୟରୁ ଏକ ଦନ୍ତା ହାତୀର ମୃତଦେହ ମିଳିଛି । ୧୪ ଟିକିଆ ହାତୀପଲରେ ତିନି ଦନ୍ତାହାତୀ ମଧ୍ୟରେ ସଂଘର୍ଷ ହୋଇ ମୃତ୍ୟୁ ଘଟିଥିବା ପ୍ରାଥମିକ ତଦନ୍ତରେ ସନ୍ଦେହ କରାଯାଉଥିଲା । ସମ୍ପ୍ରତି ହାତୀଙ୍କର ମିଳନର ସମୟ ।
ମାଈହାତୀଙ୍କ ସହିତ ମିଳନ ପାଇଁ ଦନ୍ତାଙ୍କ ମଧ୍ୟରେ ପ୍ରତିଯୋଗିତାରୁ ମୃତ ଦନ୍ତାହାତୀର ଦେହର ବିଭିନ୍ନ ସ୍ଥାନରେ କ୍ଷତ ଚିହ୍ନଥିବା ଏବଂ ଏହା ସଂଘର୍ଷଜନିତ ମୃତ୍ୟୁ ବୋଲି ସନ୍ଦେହ କରାଯାଇଥିଲା । କିନ୍ତୁ ବ୍ୟବଚ୍ଛେଦ ବେଳେ ହାତୀକୁ ଓଲଟାଇବାରୁ ହାତୀ ଦେହରେ ବିଦ୍ୟୁତ୍ ତାର ଆଘାତର ଚିହ୍ନ ସାମ୍ନାକୁ ଆସିଥଲା । ମିଳିତ ଟାସ୍କଫୋର୍ସର ଅନୁଧ୍ୟାନ ଏବଂ ବ୍ୟବଚ୍ଛେଦରେ ମଧ୍ୟ ଏହା ବିଦ୍ୟୁତ୍ଜନିତ ମୃତ୍ୟୁ ବୋଲି ଜଣାପଡିଛି । ଜଙ୍ଗଲ ଭିତରେ ବିଲଟି ଥିବାରୁ ଚାଷକୁ ବଞ୍ଚାଇବାକୁ କିମ୍ବା ଶିକାର ଉଦ୍ଦେଶ୍ୟରେ ବିଲ ଚାରିପଟେ ବିଦ୍ୟୁତ୍ ତାର ଲଗାଯାଇଥିବା ବନବିଭାଗ ସନ୍ଦେହ କରୁଛି । ସେଠାରେ ଚାଷ କରୁଥିବା ୪ ଭାଇ (ଚାଷୀ)ଙ୍କୁ ବନବିଭାଗ ଅଟକ ରଖି ପଚରାଉଚରା ଜାରି ରଖିଥିବାବେଳେ ଏହି ଘଟଣାରେ ଅଧିକ ଲୋକ ସାମିଲଥିବା ନେଇ ବନବିଭାଗ ସନ୍ଦେହ କରୁଛି ।
ଏମାନେ ହେଲେ ସଲେଇକେନା ପଞ୍ଚାୟତ ରୁଗୁଡିହିର ଖଜୁରାଇ ତାମସାଏ (୨୬), ଗୁଲାରାମ ତାମସାଏ (୩୦), ଜନନସିଂ ତାମସାଏ (୪୫) ଓ ରାଜୁ ତାମସାଏ (୪୭) । ଘଟଣା ଘଟିଥିବା ନିକଟ ଅଞ୍ଚଳରେ ବ୍ୟାପକ ଖୋଜାଖୋଜି ପରେ ବନବିଭାଗ ହାତରେ ଗୁରୁତ୍ୱପୂର୍ଣ୍ଣ ପ୍ରମାଣ ଲାଗିଛି । ବିଲ ନିକଟ ଜଙ୍ଗଲରୁ ତାର ବିଛାଇବାକୁ ବ୍ୟବହାର କରାଯାଇଥିବା ଖୁଣ୍ଟ ଏବଂ ଶାବଳ ଜବତ କରାଯାଇଛି । ଖୁଣ୍ଟରେ ଜିଆଇ ତାର ଗୁଡ଼ାଇବା ଦାଗ ସ୍ପଷ୍ଟ ଜଣାପଡୁଥିବା ଦେଖିବାକୁ ମିଳିଛି । ନିକଟରେ ଥିବା ଘରୁ ବିଦ୍ୟୁତ୍ ସଂଯୋଗ କରି ବିଲ ଚାରିପଟେ ବିଦ୍ୟୁତ୍ ଫାଶ ପକାଯାଇଥିବା ସନ୍ଦେହ କରାଯାଉଛି ।
ତଦନ୍ତକାରୀ ଦଳରେ ବନଖଣ୍ଡ ଅଧିକାରୀ ଧନରାଜ ଏଚ୍ଡି, ଜଏଣ୍ଟ ଟାସ୍କଫୋର୍ସ ଭୁବନେଶ୍ୱରର ଡେପୁଟି କଞ୍ଜର୍ଭେଟର୍ ହିମାଂଶୁ ଶେଖର ମହାନ୍ତି, ଆଇଏଫ୍ଏସ୍ ଅଜିଜ ଖାନ ଓ ବନାଞ୍ଚଳ ଅଧିକାରୀ ଶିବାଜୀ ମୋହନ ରାଓଙ୍କ ସମେତ ବନବିଭାଗ, ଆରକ୍ଷୀ ବିଭାଗ ଏବଂ ବିଦ୍ୟୁତ ବିଭାଗର ଅଧିକାରୀମାନେ ସାମିଲ ଥିଲେ । ଅନ୍ୟପକ୍ଷରେ କେବଳ ସେଠାରେ ଚାଷ କରୁଥିବାରୁ ତାଙ୍କୁ ଦୋଷୀ ଭାବରେ ନଦେଖି ସଠିକ ନିରପେକ୍ଷ ତଦନ୍ତ କରି ପ୍ରକୃତ ଦୋଷୀଙ୍କୁ ଦଣ୍ଡ ଦିଆଯାଉ ବୋଲି ସ୍ଥାନୀୟ ସରପଞ୍ଚ ପାଙ୍ଗେଲା ମୁଣ୍ଡା ଦାବି କରିଛନ୍ତି ।
