ଭୁବନେଶ୍ୱର: ଆଜିଠୁ ୱାର୍ଲ୍ଡ ଟେଲିଭିଜନ ପ୍ରିମିୟରର ମୁକ୍ତିଲାଭ କରୁଛି ଦୁଇଟି ଓଡ଼ିଆ ସିନେମା । ଜୀ ସାର୍ଥକରେ ସନ୍ଧ୍ୟା ୬ଟାରେ ପ୍ରସାରିତ ହେବ ସମ୍ପୂର୍ଣ୍ଣ ପାରିବାରିକ, ପ୍ରେମ ଏବଂ ଆକ୍ସନଧର୍ମୀ କାହାଣୀ ଆଧାରିତ ସିନେମା ‘କୁରୁକ୍ଷେତ୍ର’ । ପୌରାଣିକ ଗ୍ରନ୍ଥ ମହାଭାରତ ସହିତ ସମ୍ପ୍ରତିକ ପରିସ୍ଥିତିର ସାମଞ୍ଜସ୍ୟପୂର୍ଣ୍ଣ ଘଟଣାମାନକୁ କାହାଣୀ ପ୍ରସଙ୍ଗ କରି ସିନେମା ନିର୍ମାଣ ହୋଇଛି । ଏହାର ଲିଡ୍ରେ ପ୍ରଥମ ଥର ପାଇଁ ଯୋଡ଼ି ହୋଇଛନ୍ତି ଓଲିଉଡ୍ ଜେଣ୍ଟଲ୍ମ୍ୟାନ୍ ଅଭିନେତା ଆକାଶ ଦାସ ନାୟକ ଓ ନାୟିକା ତମନ୍ନା ।
ଏଥିରେ ପୁଣିଥରେ ଆକାଶ ପୁଲିସ୍ ଭୂମିକାରେ ନଜର ଆସିବେ । ସିନେମାକୁ ନେଇ ଆକାଶ ଓ ତମନ୍ନା ବହୁତ ଖୁସି ଏବଂ ଉତ୍ସାହିତ ଅଛନ୍ତି । ସିନେମାଟିକୁ ଦେଖିବା ଲାଗି ନିବେଦନ କରିଛନ୍ତି । ତାଙ୍କ ବ୍ୟତୀତ ଭେଟେରାନ ଇଲୁ ବାନାର୍ଜୀ, ସମରେଶ, ପିଣ୍ଟୁ ନନ୍ଦ ଓ ଅନ୍ୟ କଳାକାରମାନେ ଅଭିନୟ କରିଛନ୍ତି । ସିନେମାର ପ୍ରଯୋଜନା କ୍ଷୀରୋଦ ପଟ୍ଟନାୟକ କରିଥିଲା ବେଳେ ନିର୍ଦ୍ଦେଶନା ଦେଇଛନ୍ତି ଅଶ୍ୱିନୀ ତ୍ରିପାଠୀ । ସଂଳାପ ଦୀପକ କୁମାର ଲେଖିଛନ୍ତି । ସଙ୍ଗୀତ ଦେଇଛନ୍ତି ଗୁଡ୍ଲି ରଥ । ଡିଓପିରେ ଅକ୍ଷୟ ନାୟକ ଓ ସମ୍ପାଦନାରେ ମାନସ ସାହୁ ସହାୟତା କରିଛନ୍ତି । ଗତ ୧୦ ତାରିଖରେ ସିନେମାର ସ୍ୱତନ୍ତ୍ର ଶୋ’ ଭୁବନେଶ୍ୱର ଆଇନକ୍ସରେ ଅନୁଷ୍ଠିତ ହୋଇଯାଇଛି ।
ସେହିପରି ତରଙ୍ଗ ସିନେ ପ୍ରଡକ୍ସନ୍ସ ୧୫ ବର୍ଷ ତଳର ସୁନ୍ଦର ପ୍ରେମ କାହାଣୀକୁ ନେଇ ସିନେମା ‘ଅଧାଲେଖା ଗପ’ ନିର୍ମାଣ କରିଛି । ଯେଉଁଥିରେ ନାୟକ, ନାୟିକା ଉଭୟ ପ୍ରେମ ପାଇଁ ଜୀବନ ହାରି ଦେଇଛନ୍ତି । କିନ୍ତୁ ତାଙ୍କ ଜୀବନ ହାରିବା ପଛରେ ମାନ ଅଭିମାନ ନାହିଁ, ରାଗରୁଷା ନାହିଁ । ବରଂ ସମାଜର ଜାତିଭେଦର ଚାପରୁ ତାଙ୍କ ପ୍ରେମକୁ ବଞ୍ଚେଇବାକୁ ଯାଇ ଦୁହେଁ ଜୀବନ ହାରି ଦେଇଛନ୍ତି । ୧୯୯୫ର ଏଇ ପ୍ରେମର ପରିଭାଷା କେମିତି ଥିଲା ତାକୁ ସୁନ୍ଦର ଭାବରେ ଚଳଚ୍ଚିତ୍ରରେ ଚିତ୍ରିତ କରାଯାଇଛି ।
ଏହାର ନିର୍ଦ୍ଦେଶନା ଦେଇଛନ୍ତି ସୁଧାଂଶୁ ସାହୁ । ଗୀତ ଓ କାହାଣୀ ଦେବୀଦତ୍ତ ମହାନ୍ତି, ସଂଳାପ ବି. ଚନ୍ଦନ କୁମାର, ସଙ୍ଗୀତ ପ୍ରେମ୍ ଆନନ୍ଦ, ପ୍ରଯୋଜନାରେ ପ୍ରଦ୍ୟୁମ୍ନ ଲେଙ୍କା, ଏଡିଟିଂରେ ରାଜେଶ ଦାଶ ଓ କ୍ୟାମେରାରେ ରବୀନ୍ଦ୍ର ବେହେରା ସହାୟତା କରିଛନ୍ତି । ସିନେମାର ଲିଡ୍ରେ ଅଭିଷେକ ଗିରି, ଆର୍ଲିନ୍ ଅଙ୍କିତା ଥିଲା ବେଳେ ଅନ୍ୟାନ୍ୟ ଭୂମିକାରେ ସାତ୍ତ୍ୱିକୀ ମିଶ୍ର, ମଧୁମିତା, ପ୍ରଦ୍ୟୁମ୍ନ ଲେଙ୍କା, ଚୌଧୁରୀ ବିକାଶ ଦାସ, ଅନନ୍ତ ମିଶ୍ର, ଦେବୀ ବାରିକ, ଐଶ୍ୱର୍ଯ୍ୟା ଓ ବିଜୟଲକ୍ଷ୍ମୀ ପ୍ରମୁଖ ଅଭିନୟ କରିଛନ୍ତି ।
