ଚଣ୍ଡିଗଡ଼ : ହରିୟାଣା ପୁଲିସ ଶନିବାର ସୋନିପତ୍ ଜିଲ୍ଲା ଅନ୍ତର୍ଗତ ଜୁଆନ୍ ଗ୍ରାମରୁ ଖଲିସ୍ତାନ ସଂଗଠନର ୩ ଜଣ ସନ୍ଦିଗ୍ଦ ଆତଙ୍କବାଦୀଙ୍କୁ ଗିରଫ କରିଛି । ଏକାଧିକ ଅପରାଧିକ ରେକର୍ଡ ଥିବା ସାଗର, ସୁନୀଲ ଓ ଯତୀନ ନାମକ ଏହି ତିନିଜଣ ବ୍ୟକ୍ତି ପଞ୍ଜାବରେ କଣ୍ଟ୍ରାକ୍ଟ କିଲର (ସୁପାରି ନେଇ ହତ୍ୟା କରୁଥିବା) ଭାବେ ବେଶ ଜଣାଶୁଣା ।
ସାମାଜିକ ଗଣମାଧ୍ୟମରେ ଏମାନେ ଖଲିସ୍ତାନ ସଂଗଠନକୁ ସମର୍ଥନ କରୁଥିବାବେଳେ ଆବଶ୍ୟକ ପଡିଲେ ସଂଗଠନରେ ସକ୍ରିୟ ଥିବା ଆତଙ୍କବାଦୀଙ୍କ ସହ ଯୋଗସୂତ୍ର ରକ୍ଷା କରୁଥିଲେ ବୋଲି ହରିୟାଣା ପୁଲିସ ପକ୍ଷରୁ କୁହାଯାଇଛି । ଭାରତୀୟ ପିଙ୍ଗଳ କୋଡ୍ର ଧାରା ୧୨୦(ଖ) ଏବଂ ୟୁଏପିଏର ୧୭ରୁ ୨୧ ପର୍ଯ୍ୟନ୍ତ ପାଞ୍ଚଟି ଧାରା ଅନୁଯାୟୀ ସେମାନଙ୍କ ବିରୋଧରେ ମାମଲା ରୁଜୁ କରାଯାଇଛି । ପଞ୍ଜାବ ସମେତ ଦେଶର ବିଭିନ୍ନ ସ୍ଥାନରେ ଆତଙ୍କବାଦୀ କାର୍ଯ୍ୟ ସମ୍ପାଦନ କରିବାକୁ ସେମାନେ ବିଦେଶରୁ ଅର୍ଥ ଓ ଅସ୍ତ୍ରଶସ୍ତ୍ର ପାଉଥିବା ଜଣାପଡିଛି। ସେମାନଙ୍କ ନିକଟରୁ ଗୋଟିଏ ଏକେ-୪୭ ରାଇଫଲ, ୩ଟି ବିଦେଶୀ ପିସ୍ତଲ ଓ ଜୀବନ୍ତ ଗୁଳି ଜବତ କରାଯାଇଛି ।
