ମୁମ୍ବାଇ : ପାର୍ବଣ ରୁତୁରେ ମହାରାଷ୍ଟ୍ରର ସୁରକ୍ଷାକୁ ନେଇ ପ୍ରଶ୍ନବାଚୀ ଛିଡା ହୋଇଛି । ଗତ କିଛିଦିନ ହେବ ମୁମ୍ବାଇରେ ବିସ୍ଫୋରଣ କରିବାକୁ ଧମକପୂର୍ଣ୍ଣ ଫୋନ୍ କଲ୍ ପୋଲିସ ଏବଂ ସୁରକ୍ଷା ଏଜେନ୍ସିର ନିଦ ହଜାଇ ଦେଇଛି । ଆଉ ଏବେ ରାଜଧାନୀ ମୁମ୍ବାଇରେ ତିନୋଟି ସ୍ଥାନକୁ ବିସ୍ଫୋରଣରେ ଉଡ଼ାଇଦେବାର ଧମକ ଆସିଛି । ସୂଚନା ଅନୁଯାୟୀ, ପୋଲିସ କଣ୍ଟ୍ରୋଲ୍ ରୁମ୍କୁ ଏକ ଧମକପୂର୍ଣ୍ଣ ଫୋନ୍ କଲ ଆସିଥିଲା । ଯେଉଁଥିରେ ଅନ୍ଧେରିର ଇନଫିନିଟି ମଲ୍, ଜୁହୁର ପିଭିଆର ଏବଂ ସାଣ୍ଟାକ୍ରୁଜରେ ସାହାରାର ପଞ୍ଚ ତାରକା ହୋଟେଲ ବିସ୍ଫୋରଣ ହେବ ବୋଲି ଧମକ ମିଳିଛି ।
ଏହି ଧମକପୂର୍ଣ୍ଣ କଲ ଆସିବା ପରେ ପୋଲିସ ବିଭାଗ ମଧ୍ୟ ସତର୍କ ହୋଇପଡିଛି । ଏହି ତିନୋଟି ସ୍ଥାନ ତଥା ଏହାର ଆଖପାଖ ଅଞ୍ଚଳରେ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି । ତେବେ ବର୍ତ୍ତମାନ ପୋଲିସକୁ କିଛି ସନ୍ଦିଗ୍ଧ ସାମଗ୍ରୀ ମିଳିନାହିଁ । ସୂଚନାଥାଉକି, ନିକଟ ଅତୀତରେ ମୁମ୍ବାଇ ପୋଲିସକୁ ଏପରି ଅନେକ ଧମକପୂର୍ଣ୍ଣ କଲ ଆସିଥିଲା, ଯାହା ଅନୁସନ୍ଧାନରେ ସମ୍ପୂର୍ଣ୍ଣ ମିଥ୍ୟା ବୋଲି ଜଣାପଡିଛି । ତଥାପି ପୋଲିସ ବର୍ତ୍ତମାନର ଏଭଳି ମାମଲାରେ କୌଣସି ଅବହେଳା କରିବାକୁ ଚାହୁଁନାହିଁ । ମୁମ୍ବାଇ ପୋଲିସ ବର୍ତ୍ତମାନ ଏହି ଧମକପୂର୍ଣ୍ଣ ଫୋନ୍ କଲର ଚିହ୍ନଟ କରିବାକୁ ଚେଷ୍ଟା କରୁଛି, ଯାହାଫଳରେ ଏହି ଘଟଣାର ସତ୍ୟାସତ୍ୟ ଜଣାପଡିବ ।
