ଜୟପୁର: ପାଣି ଟାଙ୍କିରେ ଚେତାଶୂନ୍ୟ ହୋଇ ଯାଇଥିବା ଜଣେ ଯୁବକଙ୍କୁ ଉଦ୍ଧାର ଉଦ୍ୟମ ବେଳେ ବୁଡିଯାଇ ପ୍ରାଣ ହରାଇଲେ ଅନ୍ୟ ୪ ଯୁବକ । ଅନ୍ୟ ୩ଜଣ ମଧ୍ୟ ଗୁରୁତର ହୋଇ ଚିକିତ୍ସାଧୀନ ରହିଛନ୍ତି । ଏପରି କିଛି ଦୁଃଖଦ ଘଟଣା ଦେଖିବାକୁ ମିଳିଛି ରାଜସ୍ଥାନ ଆଜମେର ଜିଲ୍ଲାର ନାସିରାବାଦ ସବଡିଭିଜନ ଅଞ୍ଚଳରେ । ପାଣିରେ ବୁଡି ଯାଉଥିବା ଜଣେ ଯୁବକକୁ ବଞ୍ଚାଇବା ପାଇଁ ଜଣେ ପରେ ଜଣେ ଉକ୍ତ ପାଣିଟାଙ୍କିରେ ପ୍ରବେଶ କରିବା ପରେମୋଟ ୭ଜଣ ଯୁବକ ଚେତାଶୂନ୍ୟ ହୋଇ ପଡିଥିଲେ । ସମସ୍ତଙ୍କୁ ଉଦ୍ଧାର କରାଯାଇଥିବା ବେଳେ ସେମାନଙ୍କ ମଧ୍ୟରୁ ୪ଜଣଙ୍କ ମୃତ୍ୟୁ ହୋଇଯାଇଥିଲା ।
ଅନ୍ୟ ୩ ଜଣଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ଉକ୍ତ ପାଣି ଟାଙ୍କିରେ ବିଷାକ୍ତ ଗ୍ୟାସ ଲିକ କାରଣରୁ ଏପରି ହୋଇଥିବା ସନ୍ଦେହ କରାଯାଇଛି। ଏହି ଦୁର୍ଘଟଣାରେ ୪ଜଣ ଯୁବକଙ୍କର ପ୍ରାଣହାନୀ ଘଟିଛି । ବ୍ୟବଚ୍ଛେଦ ପରେ ମୃତ୍ୟୁର କାରଣ ସ୍ପଷ୍ଟ ହେବା ନେଇ ଆଶା କରାଯାଉଛି ।ସୂଚନା ଅନୁସାରେ, ସୁରେନ୍ଦ୍ର ଗୁର୍ଜର ପ୍ରଥମେ ପାଣି ଟାଙ୍କିରେ ପ୍ରବେଶ କରିଥିଲେ । କିଛି ସମୟ ପରେ ସେ ବାହାରକୁ ନଆସିବା ପରେ ଶିବରାଜ, ସୁରେନ୍ଦ୍ର, ଶେରୁ, ଧନରାଜ ଏବଂ ରତନ ମଧ୍ୟ ପାଣି ଟାଙ୍କିରେ ପ୍ରବେଶ କରିଥିଲେ । ଟାଙ୍କିରେ ପ୍ରବେଶ କରିବା ପରେ ସେମାନେ ମଧ୍ୟ ଚେତାଶୂନ୍ୟ ହୋଇଯାଇଥିଲେ । ସେମାନଙ୍କୁ ଉଦ୍ଧାର କରିବା ପାଇଁ ଅନ୍ୟ କିଛି ସ୍ଥାନୀୟ ବ୍ୟକ୍ତି ମଧ୍ୟ ପାଣିରେ ପ୍ରବେଶ କରିଥିଲେ । କିଛି ସମୟ ପରେ ସମସ୍ତଙ୍କୁ ପାଣିରୁ ବାହାର କରାଯାଇଥିବା ବେଳେ ୪ ଜଣଙ୍କ ମୃତ୍ୟୁ ହୋଇଥିବା ଜଣାପଡିଥିଲା । ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଥିବା ବେଳେ ଘଟଣାର ତଦନ୍ତ ଦାବି କରିଛନ୍ତି ସ୍ଥାନୀୟ ବାସିନ୍ଦା ।
