ଭୁବନେଶ୍ୱର: ସରକାରୀ ଜମିରେ ଘର କରିବାକୁ ନେଇ ଜଣେ ମହିଳାଙ୍କୁ ଆକ୍ରମଣ ହୋଇଛି । ଦୁର୍ବୃତ୍ତମାନେ ମହିଳାଙ୍କ ହାତ ଓ ଛାତିକୁ ଖଣ୍ଡାରେ ଆକ୍ରମଣ କରିଛନ୍ତି । ଯାହାଫଳରେ ମହିଳା ଜଣକ ଗୁରୁତର ଭାବେ ଆହତ ହୋଇଛନ୍ତି । ସମ୍ପୃକ୍ତ ମହିଳା ଜଣକ ହେଲେ ଭରତପୁର ଥାନା ଅନ୍ତର୍ଗତ ଫୁଲେଶ୍ୱରୀ ବସ୍ତିର ରୁସାନ୍ ବିବି । ଏଥିସହ ରୁସାନଙ୍କ ପୁଅର ହାତଗୋଡ଼ ବାନ୍ଧି ଦୁର୍ବୃତ୍ତମାନେ ନିର୍ଧୁମ ପିଟିଥିଲେ । ଏହାଦେଖି ରୁସାନା ଜୀବନ ବିକଳରେ ଦୌଡିଯାଇ ଥାନାରେ ଅଭିଯୋଗ କରିଥିଲେ । ଅଭିଯୋଗ ପରେ ପୁଲିସ ଘଟଣାସ୍ଥଳେ ପହଞ୍ଚି ତାଙ୍କ ପୁଅଙ୍କୁ ଉଦ୍ଧାର କରିଥିଲା ।
ଏନେଇ ପୁଲିସ ଏକ ମାମଲା ରୁଜୁ କରି ଅଭିଯୁକ୍ତଙ୍କୁ ଧରିବାକୁ ଉଦ୍ୟମ କରୁଛି । ସୂଚନା ଅନୁଯାୟୀ, ଭରତପୁର ଥାନା ଅନ୍ତର୍ଗତ ଫୁଲେଶ୍ୱରୀ ବସ୍ତିରେ ରୁସାନ(୪୨) ତାଙ୍କ ପୁଅ, ସ୍ୱାମୀଙ୍କ ସହ ରୁହନ୍ତି । ସରକାରୀ ଜମିରେ ଘର କରିବାକୁ କେନ୍ଦ୍ରକରି ପଡୋଶୀଙ୍କ ସହ ପୂର୍ବରୁ ରୁସାନଙ୍କ ବିବାଦ ରହିଥିଲା । ଏହି ବିବାଦ ମଙ୍ଗଳବାର ଉଗ୍ରରୂପ ଧାରଣ କରିଥିଲା ।
ମଙ୍ଗଳବାର ସନ୍ଧ୍ୟା ୬ଟା ସମୟରେ ୧୦ରୁ ଅଧିକ ଯୁବକ ହାତରେ ମାରଣାସ୍ତ୍ର ଧରି ରୁସାନଙ୍କ ଘର ସମ୍ମୁଖକୁ ଆସି ଅସଭ୍ୟ ଭାଷାରେ ଗାଳିଗୁଲଜ କରିଥିଲେ । ରୁସାନ ଆସି ପଚାରିବାରୁ ଦୁର୍ବୃତ୍ତମାନେ ହାତରେ ଧରିଥିବା ଭୁଜାଲିରେ ତାଙ୍କୁ ଗୋଡେଇ ଗୋଡେଇ ହାଣି ପକାଇଥିଲେ । ଏହାଦେଖି ପୁଅ ପ୍ରତିବାଦ କରିବାରୁ ତାଙ୍କୁ ବାନ୍ଧି ନିର୍ଧୁମ ମାଡ ମାରିଥିଲେ । ଯୁବକମାନେ ମହିଳାଙ୍କ ମୋବାଇଲ ଫୋନ୍କୁ ଛଡାଇ ନେଇ ଯିବାପରେ ସେ ଦୌଡ଼ିଯାଇ ଭରତପୁର ଥାନାରେ ଅଭିଯୋଗ କରିଥିଲେ ।
