ଡିବିରି ଆଲୁଅରୁ ଜଳିଗଲେ ମହିଳା

ପାଟଣା: କେନ୍ଦୁଝର ଜିଲ୍ଲା ପାଟଣା ଥାନା ଅନ୍ତର୍ଗତ ଅଙ୍କୁରା ଗ୍ରାମରେ ବିଳମ୍ବିତ ରାତିରେ ଶୋଇଥିବା ଅବସ୍ଥାରେ ଜଣେ ମହିଳା ଡିବିରିରୁ ନିଆଁ ଲାଗି ଜଳି ଯାଇଛନ୍ତି । ସୂଚନା ଅନୁଯାୟୀ ଅଙ୍କୁରା ଗ୍ରାମର ଟୁକୁଲୁ ମୁଣ୍ଡାଙ୍କ ପତ୍ନୀ ସୁଲୋଚନା ମୁଣ୍ଡା (୩୪) ଘରେ ଡିବିରି ଆଲୁଅ ଜାଳି ଶୋଇଥିବା ସମୟରେ ବିଳମ୍ବିତ ରାତିରେ ଡିବିରି ଆଲୁଅରୁ ନିଆଁ ଲାଗି ଜଳି ଯାଇଥିଲେ । ତାଙ୍କ ଚିତ୍କାର ଶୁଣି ପରିବାର ଲୋକେ ତାଙ୍କୁ ଉଦ୍ଧାର କରିବାକୁ ପାଟଣା ଅଗ୍ନିଶମ ବାହିନୀକୁ ଖବର ଦେଇଥିଲେ । ଘଟଣାସ୍ଥଳରେ ଅଗ୍ନିଶମ ବାହିନୀ ଗୁରୁତର ମହିଳାଙ୍କୁ ଉଦ୍ଧାର କରି ପାଟଣା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ତାଙ୍କ ଶରୀରର ୬୦ ପ୍ରତିଶତରୁ ଊର୍ଦ୍ଧ୍ବ ଅଂଶ ପୋଡ଼ି ଯାଇଥିବା ବେଳେ ତାଙ୍କୁ ସେଠାରୁ କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି ।