ଜୟପୁର: ରାଜସ୍ଥାନର ଲକ୍ଷ୍ମଣଗଡ଼ ଅଞ୍ଚଳର ନେଚୱା ପୋଲିସ ଷ୍ଟେସନ ଅଞ୍ଚଳରେ ଘଟିଛି ଏକ ସଡକ ଦୁର୍ଘଟଣା । ଦୁର୍ଘଟଣା ଫଳରେ ଏକ କାରରେ ନିଆଁ ଲାଗିଯାଇଛି । ଫଳରେ କାର ଭତରେ ଥିବା ତିନି ଜଣଙ୍କର ନିଆଁରେ ପୋଡ଼ି ମୃତ୍ୟୁ ହୋଇଛି । ଅନ୍ୟପଟରେ ଆଉ ଜଣେ ଯୁବକଙ୍କର ଗୁରୁତର ଅବସ୍ଥାରେ ଚିକିତ୍ସା ଚାଲିଛି । ତେବେ ଏତେ କମ ସମୟରେ ଏହି ଘଟଣା ଘଟିଥିଲା ଯେ, କାର ଭିତରେ ଥିବା ଲୋକ ସେଥିରୁ ବାହାରିପାରି ନଥିଲେ । ସେହି କାର ଭିତରୁ ତିନି ଜଣଙ୍କର କଙ୍କାଳ ଉଦ୍ଧାର କରାଯାଇଛି । ତେବେ ମୃତ୍ୟୁ ଘଟିଥିବା ତିନି ଜଣ ସମ୍ପର୍କୀୟ ହୋଇଥିବା ସୂଚନା ମିଳିଛି । ପୋଲିସ ପକ୍ଷରୁ ମିଳିଥିବା ସୂଚନା ଅନୁଯାୟୀ, ବୁଧବାର ସିକରର ନେଚା ପୋଲିସ ଷ୍ଟେସନ ଅଞ୍ଚଳରେ ଏହି ଘଟଣା ଘଟିଥିଲା । ଲକ୍ଷ୍ମଣଗଡ଼ ଅଞ୍ଚଳର ଚାରି ଜଣ ସାଙ୍ଗ ଏକ ବିବାହକୁ ଯାଇଥିଲେ ।
ଚାରି ଜଣ ସେହି କାରରେ ଯୋଗେ ବିବାହରୁ ଫେରୁଥିବା ସମୟରେ ଏହି ଅଘଟଣ ଘଟିଥିଲା । ଫେରିବା ସମୟରେ ଭାରସାମ୍ୟ ହରାଇ କାରଟି ଗଛ ସହିତ ମୁହାଁମୁହିଁ ଧକ୍କା ହୋଇଥିଲା । ଧକ୍କା ହେବା ପରେ କାରଟିରେ ହଠାତ ନିଆଁ ଲାଗିଯାଇଥିଲା । ମୁହାଁମୁହିଁ ଧକ୍କା ହେବା ପରେ ଦେବ କୁମାର ନାମକ ଯୁବକ କାର ଡୋର ପଟୁ ତଳେ ପଡ଼ିଯାଇଥିଲେ । କାର ଜଳିଯିବା କାରଣରୁ ତାଙ୍କ ଦେହରେ ମଧ୍ୟ ନିଆଁ ଲାଗିଯାଇଥିଲା । ତାଙ୍କୁ ଜୟପୁରର ଏସ୍ଏମ୍ଏସ୍ ହସ୍ପିଟାଲରେ ଭର୍ତ୍ତି କରାଯାଇଛି । ସୂଚନା ଅନୁଯାୟୀ, ସିକରର ଲକ୍ଷ୍ମଣଗଡ ଅଞ୍ଚଳର ୨୭ ବର୍ଷିୟ କାହ୍ନେୟାଲାଲ ତାଙ୍କ ସମ୍ପର୍କୀୟ ଭାଇଙ୍କ ବାହାଘରକୁ ଯାଇଥିଲେ । ଯାହା ସିହୋତରେ ହେଉଥିଲା । ସେ ତାଙ୍କର ତିନି ସାଙ୍ଗ ମୋହିତ (୧୮ ବର୍ଷ), ସୋନୁ (୧୮ ବର୍ଷ) ଏବଂ ଦେବ କୁମାରଙ୍କ ସହିତ ସିହୋତ ଯାଇଥିଲେ । ବିଳମ୍ବିତ ରାତିରେ ବିବାହ ଉତ୍ସବରେ ଯୋଗଦେବା ପରେ ଏହି ଚାରି ସାଙ୍ଗ ଲକ୍ଷ୍ମଣଗଡ଼ ଫେରୁଥିବା ବେଳେ ଏହି ଦୁର୍ଘଟଣା ଘଟିଥିବା ସୂଚନା ମିଳିଛି । ତେବେ କାର ଭିତରେ କିଛି ବାଣ ରଖାଯାଇଥିଲା । ଯାହା କାରଣରୁ ଏହି ଅଗ୍ନିକାଣ୍ଡ ଘଟିଥିବା ଜଣାପଡ଼ିଛି ।
