ଭୁବନେଶ୍ୱର: ଜଣେ ଟାଟୁ ଆର୍ଟିଷ୍ଟଙ୍କୁ ମାରଣାନ୍ତକ ଆକ୍ରମଣ ଅଭିଯୋଗରେ ଖାରବେଳନଗର ଥାନା ପୁଲିସ ୪ ଜଣଙ୍କୁ ଗିରଫ କରି କୋର୍ଟଚାଳାଣ କରିଛି । ଗିରଫ ଅଭିଯୁକମାନେ ହେଲେ ୟୁପିଟ-୩ ଅଞ୍ଚଳର ଦିନେଶ ଖାଉଡିଆ, ବିଶାଳ ଖାଉଡିଆ, କରନ ଖାଉଡିଆ ଏବଂ ନୟାପଲ୍ଲୀ ସାଲିଆ ସାହି ତାରିଣୀନଗର ବସ୍ତିର ପ୍ରହଲାଦ ଖାଉଡିଆ । ଅଭିଯୁକ୍ତମାନେ ଗୁଜୁରାଟର ମୂଳ ବାସିନ୍ଦା ଅଟନ୍ତି । ସୂଚନାଯୋଗ୍ୟ ଯେ, ଗତ କାଲି ଅଭିଯୁକ୍ତ ଦିନେଶ, ବିଶାଳ, ଏବଂ କରନ ସନ୍ଧ୍ୟା ସମୟରେ ସାଗର ମେହେରଙ୍କୁ ୟୁନିଟ୍-୩ ଚାର୍ଲି ହୋଟେଲ ନିକଟକୁ ଟାଟୁ କରିବା ପାଇଁ ଡ଼ାକିଥିଲେ । ସାଗର ମେହେର ଜଣେ ଟାଟୁ ଆର୍ଟିସ୍ଟ ହୋଇଥିବାରୁ ସେ ତାଙ୍କର ସହଯୋଗୀଙ୍କ ସହିତ ୟୁନିଟ୍-୩ ଚାର୍ଲି ହୋଟେଲ ନିକଟକୁ ଆସିଥିଲେ ।
ଅଭିଯୁକ୍ତମାନେ ପୂର୍ବ ଶତ୍ରୁତାକୁ କେନ୍ଦ୍ର କରି ଘଟଣା ସ୍ଥଳରେ ସାଗର ଏବଂ ତାଙ୍କର ସହଯୋଗୀଙ୍କୁ ଅସଭ୍ୟ ଭାଷାରେ ଗାଳି କରିବା ସହ ହତ୍ୟା କରିବା ଉଦେଶ୍ୟରେ ଗୋଟିଏ ଲୁହ ରଡ ରେ ଉଭୟଙ୍କୁ ଆକ୍ରମଣ କରିଥିଲେ । ସେହି ସମୟରେ ଅଭିଯୁକ୍ତ ପ୍ରହଲାଦ ଅତ୍ୟନ୍ତ ଉତ୍ୟକ୍ତ ହୋଇ ଏକ ଲୁହା ରଡ ରେ ସାଗରଙ୍କ ମୁଣ୍ଡକୁ ଲକ୍ଷ କରି ପୁନର୍ବାର ଆକ୍ରମଣ କରିଥିଲେ । ଆକ୍ରମଣ ହେତୁ ଉଭୟେ ସାଗର ଏବଂ ତାଙ୍କର ସହଯୋଗୀ ଗୁରୁତ୍ତର ଆହତ ହେବା ପରେ ଅଭିଯୁକ୍ତ ମାନେ ସାଗରଙ୍କର ମୋଟରସାଇକେଲ ଟିକୁ ମଧ୍ୟ ଭାଙ୍ଗି ଦେବା ସହ ଧମକ ଦେଇ ଘଟଣା ସ୍ଥଳରୁ ଚାଲି ଯାଇଥିଲେ । ସାଗର ଏନେଇ ଖାରବେଳ ନଗର ଥାନାରେ ଅଭିଯୋଗ କରିବା ପରେ ପୁଲିସ ତଦନ୍ତ କରିବା ସହ ଅଭିଯୁକ୍ତ ମାନଙ୍କୁ ଗିରଫ କରି ତଦନ୍ତ ପାଇଁ ଥାନାକୁ ଆଣିଥିଲେ । ତଦନ୍ତ ସମୟରେ ଅଭିଯୁକ୍ତ ମାନେ ପୂର୍ବ ଶତ୍ରୁତାକୁ ନେଇ ଆକ୍ରମଣ କରିଥିବା ସ୍ୱୀକାର କରିଥିଲେ । ଏହି ମାମଲାର ଅଧିକ ତଦନ୍ତ ଚାଲୁ ରହିଛି ।
