ନୂଆଦିଲ୍ଲୀ: ସୁପ୍ରିମକୋର୍ଟ ଆଦାନୀ-ହିଣ୍ଡନବର୍ଗ ମାମଲାରେ ବୁଧବାର ବଡ଼ ରାୟ ଶୁଣାଇଛନ୍ତି । ସେବି ତଦନ୍ତ ରିପୋର୍ଟରେ ହସ୍ତକ୍ଷେପ କରିବା ପାଇଁ କୋର୍ଟ ମନା କରିଦେଇଛନ୍ତି । ୩ ଜଜଙ୍କ ଖଣ୍ଡପୀଠ କହିଛନ୍ତି ଯେ ସେବି ତଦନ୍ତ ଠିକ୍ ଅଛି ଏବଂ ସେ ଏହି ମାମଲାର ତଦନ୍ତ ପାଇଁ ସକ୍ଷମ ଏଜେନ୍ସି ଅଟେ । ମାର୍କେଟ୍ ନିୟାମକ ଆଦାନୀ-ହିଣ୍ଡନବର୍ଗ ମାମଲାରେ ୨୪ ମଧ୍ୟରୁ ୨୨ ମାମଲାର ତଦନ୍ତ ଶେଷ କରିସାରିଛି । ଏବେ ଆଉ ଦୁଇଟି ମାମଲାର ତଦନ୍ତ ବାକି ରହିଛି । ଏହି ଦୁଇ ମାମଲାକୁ ଶେଷ କରିବା ପାଇଁ ସୁପ୍ରିମକୋର୍ଟ ସେବିକୁ ତିନି ମାସ ସମୟ ଦେଇଛନ୍ତି ।
ଏହା ପୂର୍ବରୁ ନଭେମ୍ୱର ୨୪ରେ ଏହି ମାମଲାରେ ଶୁଣାଣି କରି କୋର୍ଟ ମାର୍କେଟ୍ ନିୟାମକ ସେବିର ତଦନ୍ତ ଏବଂ ଏକ୍ସପର୍ଟ୍ସ କମିଟି ଉପରେ ଉଠାଯାଉଥିବା ପ୍ରଶ୍ନକୁ ଖାରଜ କରି ନିଜ ରାୟ ସଂରକ୍ଷିତ ରଖିଥିଲେ । ଉଲ୍ଲେଖଯୋଗ୍ୟ ଆମେରିକାର ସର୍ଟ ସେଲର ଫାର୍ମ ୨୦୨୩ ଜାନୁଆରୀ ମାସରେ ଆଦାନୀ ଗ୍ରୁପକୁ ନେଇ ଏକ ରିସର୍ଚ୍ଚ ରିପୋର୍ଟ ପ୍ରକାଶ କରିଥିଲା । ଏଥିରେ ଆଦାନୀ କମ୍ପାନିର ସେୟାର ଓଭରଭେଲ୍ୟୁଡ୍ ଏବଂ ସେୟାର ମୂଲ୍ୟରେ ହେରଫେର୍ କରିଥିବା ଅଭିଯୋଗ ଆଣିଥିଲା ।
