୫ମ ରାଉଣ୍ଡରେ ସୁନକ୍ ଆଗୁଆ

ଲଣ୍ଡନ: ବ୍ରିଟେନର ପରବର୍ତ୍ତୀ ପ୍ରଧାନମନ୍ତ୍ରୀ ନିଯୁକ୍ତି ପ୍ରକ୍ରିୟାରେ ଭାରତୀୟ ବଂଶୋଦ୍ଭବ ଋଷି ସୁନକ୍ ଆଗୁଆ ରହିଛନ୍ତି । ବୁଧବାର ପଞ୍ଚମ ରାଉଣ୍ଡ ସୁଦ୍ଧା ସୁନକ୍‌ଙ୍କୁ ୧୩୭ ଭୋଟ୍ ମିଳିଥିବାବେଳେ ତାଙ୍କର ନିକଟତମ ପ୍ରତିଦ୍ୱନ୍ଦ୍ୱୀ ଲିଜ୍ ଟ୍ରସ୍‌ଙ୍କୁ ୧୧୩ ଭୋଟି ମିଳିଛି । ଏପର୍ଯ୍ୟନ୍ତ ସବୁ ରାଉଣ୍ଡରେ ସୁନକ୍ ଆଗୁଆ ରହିଥିଲେ ସୁଦ୍ଧା ଚୂଡାନ୍ତ ପର୍ଯ୍ୟାୟରେ ଟ୍ରସ୍‌ଙ୍କ ସହ ତାଙ୍କର କଡା ମୁକାବିଲା ହେବ ବୋଲି ଆଶା କରାଯାଉଛି। ବର୍ତ୍ତମାନ ପ୍ରଧାନମନ୍ତ୍ରୀ ଦୌଡରେ କେବଳ ସୁନକ୍ ଓ ଟ୍ରସ୍ ରହିଥିବାବେଳେ ଆସନ୍ତା ସୋମବାର ବିବିସିରେ ପ୍ରସାରିତ ହେବାକୁ ଥିବା ବିତର୍କରେ ସେମାନେ ଅଂଶଗ୍ରହଣ କରିବେ । ପଞ୍ଚମ ରାଉଣ୍ଡରେ ଅନ୍ୟତମ ପ୍ରତିଯୋଗୀ ପେନି ମୋରଡଣ୍ଟ୍‌ଙ୍କୁ ୧୦୫ ଭୋଟ ମିଳିଥିବାବେଳେ ଦୌଡରୁ ସେ ବାଦପଡିଛନ୍ତି । ତେଣୁ ଚୂଡାନ୍ତ ପର୍ଯ୍ୟାୟରେ କନ୍‌ଜର୍ଭେଟିଭ୍ ପାର୍ଟର ଏହି ୧୦୫ ସାଂସଦ କାହା ସପକ୍ଷରେ ଭୋଟ୍ ଦେବେ ତାହା ଅନୁମାନ କରିବା କଷ୍ଟସାଧ୍ୟ ହୋଇପଡିଛି ।