ନୂଆଦିଲ୍ଲୀ : ଦକ୍ଷିଣ ଭାରତରେ ସୃଷ୍ଟି ହୋଇଥିବା ଅତ୍ୟଧିକ ଚାପ ଯୋଗୁଁ ସାମୁଦ୍ରିକ ବାତ୍ୟା ‘ମାଣ୍ଡୁସ୍’ର ଆଶଙ୍କା ସୃଷ୍ଟି ହୋଇଛି । ଏହା ଦ୍ୱାରା ଡିସେମ୍ବର ୮ରୁ ୧୧ ତାରିଖ ପର୍ଯ୍ୟନ୍ତ ଦକ୍ଷିଣ ତାମିଲନାଡ଼ୁ, ପୁଡୁଚେରୀ ଏବଂ ଆନ୍ଧ୍ରପ୍ରଦେଶ ତଟବର୍ତ୍ତୀ ଅଞ୍ଚଳରେ ବିଶେଷ ଭାବେ ପ୍ରଭାବିତ ହେବ । ଏଥିପାଇଁ ଭାରତୀୟ ପାଣିପାଗ ବିଭାଗ (ଆଇଏମ୍ଡି) ପକ୍ଷରୁ ଆଲର୍ଟ ଜାରି କରାଯାଇଛି । ମାଣ୍ଡୁକା ପ୍ରଭାବରୁ ୯ ତାରିଖରେ ଘଣ୍ଟା ପ୍ରତି ୭୦ କିମି ବେଗରେ ପବନ ସହିତ ଆଗାମୀ ତିନିଦିନ ଭୀଷଣ ବର୍ଷା ହେବାର ଆଶଙ୍କା ରହିଛି । ବୁଧବାର ମଧ୍ୟ ଦକ୍ଷିଣ-ପଶ୍ଚିମ ଏବଂ ଦକ୍ଷିଣ-ପୂର୍ବ ବଙ୍ଗୋସାଗରରେ ଡିପ୍ ଡିପ୍ରେସନ୍ ସୃଷ୍ଟି ହୋଇଥିଲା । ଗୁରୁବାର ସାମୁଦ୍ରିକ ବାତ୍ୟା ‘ମାଣ୍ଡୁସ୍’ କରାଇକଲଠାରୁ ପ୍ରାୟ ୫୦୦ କିମି ପୂର୍ବ-ଦକ୍ଷିଣ ଏବଂ ଚେନ୍ନାଇଠାରୁ ୫୮୦ କିମି ଦକ୍ଷିଣ-ପୂର୍ବ ଦିଗରେ ରହିଥିଲା ।
ତାମିଲନାଡ଼ୁ, ପୁଡୁଚେରୀ ଏବଂ ଆନ୍ଧ୍ରପ୍ରଦେଶ କେତେକ ଅଞ୍ଚଳରେ ଭୀଷଣ ବର୍ଷା ହେବାର ସମ୍ଭାବନା ଥିବା ବେଳେ ଡିସେମ୍ବର ୧୦ ତାରିଖରୁ ଏହି ଅଞ୍ଚଳରେ ପବନର ଗତିରେ ହ୍ରାସ ଘଟି ଘଣ୍ଟା ପ୍ରତି ୫୦-୬୦ କିମି ହୋଇଯିବ । ଏହାପରେ ରାତି ସୁ୍ଧା ଏହା ୪୦-୫୦ ବେଗରେ ପହଞ୍ଚିବ । ଏହା ମଧ୍ୟରେ ଆଗାମୀ ଚାରିଦିନ ପାଇଁ ଶ୍ରୀଲଙ୍କା ତଟ ଏବଂ ବଙ୍ଗୋପସାଗରକୁ ନଯିବା ପାଇଁ ମତ୍ସ୍ୟଜୀବୀମାନଙ୍କୁ ସରକାରଙ୍କ ପକ୍ଷରୁ ପରାମର୍ଶ ଦିଆଯାଇଛି। ଏନ୍ଡିଆର୍ଏଫ୍ ଟିମ୍କୁ ଆଲର୍ଟ ମୋଡ୍ରେ ରଖାଯାଇଛି । ସେହିପରି ଆନ୍ଧ୍ରପ୍ରଦେଶର ତଟବର୍ତ୍ତୀ ଜିଲ୍ଲାଗୁଡ଼ିକର ସମସ୍ତ ବିଭାଗୀୟ ଅଧିକାରୀଙ୍କୁ ସତର୍କ ରହିବାକୁ ନିର୍ଦ୍ଦେଶ ଦିଆଯାଇଛି । ସାମୁଦ୍ରିକ ବାତ୍ୟାକୁ ଦୃଷ୍ଟିରେ ରଖି ଡିସେମ୍ବର ୮ରୁ ୧୧ ତାରିଖ ପର୍ଯ୍ୟନ୍ତ ରିଲିଫ୍ ଏବଂ ଉଦ୍ଧାର କାର୍ଯ୍ୟ ପାଇଁ ପ୍ରସ୍ତୁତ ରହିବାକୁ କୁହାଯାଇଛି ।
