ଟ୍ରକ୍ ଚାପାରେ ପୁଅ ମୃତ, ମା’ ଗୁରୁତର

ପାରାଦୀପ : ଅଠରବାଙ୍କୀସ୍ଥିତ ଟର୍ମିନାଲ ଛକ ନିକଟରେ ଶୁକ୍ରବାର ଏକ ସଡ଼କ ଦୁର୍ଘଟଣାରେ ଜଣେ ସ୍କୁଲ ଛାତ୍ରଙ୍କ ମୃତ୍ୟୁ ହୋଇଥିବାବେଳେ ତାଙ୍କ ମା’ ଗୁରୁତର ହୋଇଛନ୍ତି । ପ୍ରକାଶଯେ, ପାରାଦୀପସ୍ଥିତ ବେଥାନୀ କନଭେଟ ସ୍କୁଲରେ ଶିକ୍ଷକତା କରୁଥିବା ନେହା ଖଣ୍ଡେଲଓାଲ୍ ସ୍କୁଲ ସାରି ସ୍କୁଟି ଯୋଗେ ପୁଅକୁ ସ୍କୁଲରୁ ନେଇ ତାରିଣୀଗଡାସ୍ଥିତ ଘରକୁ ଫେରୁଥିଲେ । ଅଠରବାଙ୍କୀ ଟର୍ମିନାଲ ଛକ ଅତିକ୍ରମ କରି ଯିବାବେଳକୁ ଏକ ଟ୍ରକ୍ ଦ୍ରୁତଗତିରେ ଆସି ନେହାଙ୍କ ସ୍କୁଟିକୁ ପଛପଟୁ ଧକ୍କା ଦେଇଥିଲା । ଫଳରେ ତାଙ୍କ ପୁଅ ଜିଆନ୍ସ ଖଣ୍ଡେଲଓାଲ୍ ଗାଡ଼ତରୁ ତଳକୁ ଖସି ଛିଟିକି ପଡିଥିଲେ । ଏହି ସମୟରେ ଟ୍ରକ୍‌ଟି ତା’ ମୁଣ୍ଡ ଉପରେ ଚଢିଯାଇଥିଲା । ଫଳରେ ଘଟଣାସ୍ଥଳରେ ଜିଆନ୍ସଙ୍କ ମୃତ୍ୟୁ ହୋଇଥିଲା । ଗୁରୁତର ଅବସ୍ଥାରେ ନେହାଙ୍କୁ ପ୍ରଥମେ ଅଠରବାଙ୍କୀ ଓ ପରେ କଟକ ସ୍ଥାନାନ୍ତରିତ କରାଯାଇଛି । ଟ୍ରକ୍ ଡ୍ରାଇଭରକୁ ପୁଲିସ ଅଟକ ରଖି ଟ୍ରକ ଜବତ କରିଛି । ଘଟଣାସ୍ଥଳରେ ସ୍ଥାନୀୟ ଲୋକମାନେ ପ୍ରାୟ ୨ ଘଣ୍ଟା ଧରି ରାସ୍ତା ଅବରୋଧ କରିଥିଲେ । ପାରାଦୀପ ଅତିରିକ୍ତ ଆରକ୍ଷୀ ଅଧୀକ୍ଷକଙ୍କ ସହିତ ଆଲୋଚନା ପରେ ରାସ୍ତା ଅବରୋଧ ହଟିଥିଲା ।