ବ୍ରହ୍ମପୁର: ଚାଷ ଜମିରେ ଧାନ ବିହନ ବୁଣିବାକୁ କେନ୍ଦ୍ର କରି ବାପାଙ୍କୁ ପାଳିତ ପୁଅ ଆକ୍ରମଣ କରିଥିବା ନେଇ ସଦର ଥାନାରେ ଅଭିଯୋଗ ହୋଇଛି । ଏହ ଘଟଣାରେ ପୁଲିସ ଏକ ମାମଲା ରୁଜୁ କରି ଘଟରାର ତଦନ୍ତ କରି ଆଜି ପାଳିତ ପୁଅଙ୍କୁ ପୁଲିସ ଗିରଫ କରିଛି । ଅଭିଯୁକ୍ତ ଜଣଙ୍କ ହେଲେ ପି. ମିନକେଶ୍ୱର ରେଡ୍ଡୀ ବୋଲି ପୁଲିସ କହିଛି । ଅଭିଯୁକ୍ତ ପୁଅଙ୍କୁ ପୁଲିସ କେସ ନଂ ୩୩୮/୨୩ରେ କୋର୍ଟ ଚାଲାଣ କରିଛି । ସୂଚନାଯୋଗ୍ୟ ଯେ ଗୌତମି ଗ୍ରାମର ୟୁ. ଆପାରାଓ ଜଣେ ବରିଷ୍ଠ ନାଗରିକ ଅଛନ୍ତି । ତାଙ୍କ କୌଣସି ସନ୍ତାନ ନଥିବାରୁ ସେ ସେହି ଗ୍ରାମର ପି. ମିନକେଶ୍ୱର ରେଡ୍ଡୀଙ୍କୁ ପୋଷ୍ୟ ସନ୍ତାନ ଭାବରେ ରଖିଛନ୍ତି । କିନ୍ତୁ ପାଳିତ ପୁଅ ମିନକେଶ୍ୱର ବିଭିନ୍ନ ସମୟରେ ଆପାରାଓଙ୍କୁ ଆକ୍ରମଣ କରୁଥିବା ନେଇ ଥାନାରେ ଅଭିଯୋଗ ହୋଇଛି ।
ଏହି ମାମଲାରେ ସେ ଗିରଫ ହୋଇ କୋର୍ଟଚାଲାଣ ହୋଇଥିବା ବେଳେ ଜାମିନରେ ଆସିଥିଲେ । ବିଭିନ୍ନ ସମୟରେ ଉକ୍ତ ମାମଲା ଉଠେଇବା ନିମନ୍ତେ ଧମକ ଦେଉଥିଲେ । ଅନ୍ୟପକ୍ଷରେ ଆପାରାଓ କିଛି ବର୍ଷ ହେବ ସେହି ଗ୍ରାମର ବାବୁ ସ୍ୱାଇଁଙ୍କୁ ତାଙ୍କ ଜମି ଚାଷ କରିବାକୁ ଦେଇଛନ୍ତି । କିନ୍ତୁ ପୁଅ ମିନକେଶ୍ୱର ବାବୁଙ୍କୁ ଗାଳିଗୁଲଜ କରିବା ସହ ଉକ୍ତ ଚାଷ ଜମିରେ ନିଜେ ଧାନା ବିହନ ବୁଣିଥିଲେ । ଏହି ଘଟଣାକୁ ନେଇ ବାପା ଆପାରାଓ ତାଙ୍କ ପାଳିତ ପୁଅ ମିନକେଶ୍ୱରଙ୍କୁ ପଚାରିବାରୁ ସେ ତାଙ୍କୁ ତଣ୍ଟି ଚିପି ହତ୍ୟା ଉଦ୍ୟମ କରିଥିଲେ । ସେଠାରେ ଉପସ୍ଥିତ ଥିବା ଗ୍ରାମବାସୀ ତାଙ୍କୁ ଉଦ୍ଧାର କରିଥିଲେ । ପରେ ଏ ନେଇ ଆପାରାଓ ଥାନରେ ଅଭିଯୋଗ କରିଥିଲେ । ଏହି ଘଟଣାରେ ପୁଲିସ ଏକ ମାମଲା ରୁଜୁ କରି ଘଟଣାର ତଦନ୍ତ କରି ପୁଅ ପି. ମିନକେଶ୍ୱର ରେଡ୍ଡୀଙ୍କୁ ଗିରଫ କରି କୋର୍ଟ ଚାଲାଣ କରିଥିଲା।
