ଭୁବନେଶ୍ୱର : ଆଜି ନବନିଯୁକ୍ତ ପ୍ରଦେଶ କଂଗ୍ରେସ କମିଟି ସଭାପତି ଶରତ ପଟ୍ଟନାୟକ ବିଧିବିଦ୍ଧ ଭାବେ ଦାୟିତ୍ୱ ଗ୍ରହଣ କରିବେ । ଶରତଙ୍କୁ ସ୍ୱାଗତ ପାଇଁ କଂଗ୍ରେସ ଆୟୋଜନ କରିଛି ମେଗା ସମ୍ବର୍ଦ୍ଧନା କାର୍ଯ୍ୟକ୍ରମ ।
ନୂଆଦିଲ୍ଲୀରୁ ଶରତ ଆସି ଭୁବନେଶ୍ୱର ବିମାନବନ୍ଦରରେ ଦିନ ୧୧ଟା ୪୫ ମିନିଟରେ ପହଞ୍ଚିବେ । ସେଠାରୁ ଛାତ୍ର, ଯୁବ ଓ ମହିଳା କଂଗ୍ରେସର ଶହଶହ କର୍ମକର୍ତ୍ତା ବିଶାଳ ରାଲିରେ ପିସିସି ସଭାପତି ଶରତଙ୍କୁ ପାଛୋଟି ନେବେ ରାଜ୍ୟ କଂଗ୍ରେସ ଭବନ ପର୍ଯ୍ୟନ୍ତ । କଂଗ୍ରେସ ଭବନ ପରିସରରେ ଆୟୋଜିତ ହେବେ ସଭା । ଏ ସଭାରେ ପୂର୍ବତନ ପିସିସି ସଭାପତି ନିରଞ୍ଜନ ପଟ୍ଟନାୟକ, ଜୟଦେବ ଜେନା, ପ୍ରସାଦ ହରିଚନ୍ଦନଙ୍କ ସମେତ ଦଳର ସବୁ ବିଧାୟକ, ସାଂସଦ, ଛାମୁଆ ସଂଗଠନ ନେତା, ପିସିସି ସଭ୍ୟ, ଜିଲ୍ଲା ସଭାପତି, ବ୍ଲକ ସଭାପତିମାନେ ଯୋଗ ଦେବା କାର୍ଯ୍ୟକ୍ରମ ରହିଛି । ପ୍ରାୟ ୧୦ ହଜାର ଲୋକଙ୍କୁ ଏକାଠି କରି ଶକ୍ତି ପ୍ରଦର୍ଶନ କରିବା ଲକ୍ଷ୍ୟରେ ଅଛି କଂଗ୍ରେସ ।
