ନୂଆଦିଲ୍ଲୀ: ଦିଲ୍ଲୀ ଅବକାରୀ ଘୋଟାଲା ମାମଲାରେ ଗିରଫ ଆପ୍ ରାଜ୍ୟସଭା ସାଂସଦ ସଞ୍ଜୟ ସିଂହଙ୍କ ଜେଲ୍ ହାଜତ ମିଆଦ ନଭେମ୍ବର ୧୦ ତାରିଖ ପର୍ଯ୍ୟନ୍ତ ବୃଦ୍ଧି ପାଇଛି । ୧୪ ଦିନିକିଆ ହାଜତ ମିଆଦି ଶେଷହେବା ପରେ ଶୁକ୍ରବାର ତାଙ୍କୁ ରାଉଜ୍ ଏଭେନ୍ୟୁ କୋର୍ଟରେ ହାଜର କରାଯାଇଥିଲା । କୋର୍ଟରେ ଶୁଣାଣି ବେଳେ ସ୍ୱତନ୍ତ୍ର ଜଜ୍ ଏମ୍କେ ନାଗପାଲ୍ ସଞ୍ଜୟ ସିଂହଙ୍କୁ ପାରିବାରିକ ଖର୍ଚ୍ଚ ଏବଂ ସଂସଦ ସଦସ୍ୟ ଭାବେ ଅଞ୍ଚଳର କାର୍ଯ୍ୟ ପାଇଁ ଦୁଇଟି ଚେକ୍ରେ ହସ୍ତାକ୍ଷର କରିବାକୁ ଅନୁମତି ଦେଇଥିଲେ ।
ସେହିପରି ନିଜ ବ୍ୟକ୍ତିଗତ ଡାକ୍ତରଙ୍କ ସହିତ ପରାମର୍ଶ ପାଇଁ ଅନୁମତି ଦେବାକୁ ସିଂହଙ୍କ ପକ୍ଷରୁ ଦାଖଲ ଆବେଦନକୁ କୋର୍ଟ ସ୍ୱୀକାର କରିଛନ୍ତି । ଏହା ସହିତ ତାଙ୍କର ଉଚିତ ଚିକିତ୍ସା ସୁନିଶ୍ଚିତ କରିବା ନିମନ୍ତେ କୋର୍ଟ ଜେଲ୍ ଅଧୀକ୍ଷକଙ୍କୁ ନିର୍ଦ୍ଦେଶ ଦେଇଛନ୍ତି । ତେବେ ଅଭିଯୁକ୍ତ ମେଡିକାଲ୍ ସେଣ୍ଟର୍ ଯିବାବେଳେ ଯେପରି ସେଠାରେ ତାଙ୍କ ସମର୍ଥକ ଓ ଅନ୍ୟ ଲୋକ ଜମା ନହୁଅନ୍ତି, ତାହା ସୁନିଶ୍ଚିତ କରିବା ପାଇଁ ସିଂହଙ୍କ ଓକିଲଙ୍କୁ ମଧ୍ୟ କୋର୍ଟ ନିର୍ଦ୍ଦେଶ ଦେଇଛନ୍ତି ।
