ମକ୍କା:ପର୍ତ୍ତୁଗାଲ୍ର ତାରକା ଫୁଟବଲର୍ କ୍ରିଷ୍ଟିଆନୋ ରୋନାଲ୍ଡୋ ଗୁରୁବାର ତାଙ୍କ ଜାଜ୍ଜ୍ୱଲ୍ୟମାନ କ୍ୟାରିଅର୍ରେ ଆଉ ଏକ ଗୁରୁତ୍ୱପୂର୍ଣ୍ଣ ଉପଲବ୍ଧି ହାସଲ କରିଛନ୍ତି । ସେ ଗୁରୁବାର ଏଠାରେ ଖେଳାଯାଇଥିବା ଘରୋଇ ଅଲ୍ ୱେହଦା ବିପକ୍ଷ ମ୍ୟାଚ୍ରେ ୪ଟି ଗୋଲ୍ ଦେଇ ଦଳକୁ ୪-୦ରେ ବିଜୟୀ କରାଇବା ସହ କ୍ଲବ୍ କ୍ୟାରିଅର୍ରେ ୫୦୦ ଗୋଲ୍ ପୂରଣ କରିଛନ୍ତି । ସାଉଦୀ ଆରବ କ୍ଲବ୍ ଅଲ୍ ନସର୍ ସହ ଗତ ଡିସେମ୍ବରରେ ଅଢ଼େଇ ବର୍ଷ ପାଇଁ ଚୁକ୍ତିବଦ୍ଧ ହୋଇଥିବା ରୋନାଲ୍ଡୋ ଚଳିତ ସାଉଦୀ ପ୍ରୋ ଲିଗ୍ରେ ଏହି ସଫଳତା ପାଇଛନ୍ତି । ୩୮ ବର୍ଷୀୟ ରୋନାଲ୍ଡୋ ଅଦ୍ୟାବଧି ୫ଟି ଲିଗ୍ରେ ୫ଟି ପୃଥକ୍ ଦଳ ପକ୍ଷରୁ ଖେଳି ୫୦୩ଟି ଗୋଲ୍ ସ୍କୋର୍ କରିଛନ୍ତି ।
ଏଥି ମଧ୍ୟରୁ ୩୧୧ଟି ଗୋଲ୍ ରିଅଲ୍ ମାଡ୍ରିଡ୍ ପକ୍ଷରୁ, ୮୧ଟି ଜୁଭେଣ୍ଟସ୍ ପକ୍ଷରୁ, ୧୦୩ଟି ମାଞ୍ଚେଷ୍ଟର୍ ୟୁନାଇଟେଡ୍ ପକ୍ଷରୁ, ୩ଟି ସ୍ପୋର୍ଟିଂ ଲିସ୍ବନ୍ ପକ୍ଷରୁ ଏବଂ ଅବଶିଷ୍ଟ ୫ଟି ଅଲ୍-ନସର୍ ପକ୍ଷରୁ ଦେଇଛନ୍ତି । ଆଲୋଚ୍ୟ ମ୍ୟାଚ୍ରେ ରୋନାଲ୍ଡୋ ହ୍ୟାଟ୍ରିକ୍ ଗୋଲ୍ ସ୍କୋର୍ କରିବା ପରେ କ୍ୟାରିଅର୍ରେ ୬୧ତମ ଥର ପାଇଁ ଏପରି ସଫଳତା ଅର୍ଜନ କରିଛନ୍ତି । ଗୁରୁବାର ମ୍ୟାଚ୍ରେ ସେ ୨୧ତମ, ୪୦ତମ, ୫୩ତମ (ପେନାଲ୍ଟି) ଓ ୬୧ତମ ମିନିଟ୍ରେ ଗୋଲ୍ ଦେଇଥିଲେ । ଏହି ବିଜୟ ସହ ଅଲ୍-ନସର୍ ୧୬ଟି ମ୍ୟାଚ୍ ପରେ ଶୀର୍ଷ ସ୍ଥାନରେ ରହିଛି । ୩୭ ପଏଣ୍ଟ୍ ସହ ଦଳ ଅଲ୍-ଶବାବ୍ ସହ ସମାନ ସ୍ଥିତିରେ ରହିଥିଲେ ମଧ୍ୟ ଗୋଲ୍ ବ୍ୟବଧାନରେ ଆଗୁଆ ରହି ଶୀର୍ଷ ସ୍ଥାନ ଅର୍ଜନ କରିଛି । ଅନ୍ୟପକ୍ଷରେ ରୋନାଲ୍ଡୋଙ୍କ ନାମରେ ଚାମ୍ପିଅନ୍ସ ଲିଗ୍ରେ ସର୍ବାଧିକ ୧୪୦ ଗୋଲ୍ ରେକର୍ଡ ସହ ୧୧୮ଟି ଅନ୍ତର୍ଜାତୀୟ ଗୋଲ୍ ରେକର୍ଡ ମଧ୍ୟ ରହିଛି । ସେହିପରି ଗତ ରବିବାର ନିଜର ୩୮ତମ ଜନ୍ମଦିନ ପାଳନ କରିଥିବା ରୋନଲ୍ଡୋ ଅଲ୍-ନସର୍ ପାଇଁ ଅଦ୍ୟାବଧି ୫ଟି ଗୋଲ୍ ଦେଇସାରିଛନ୍ତି ।
