ଭୁବନେଶ୍ୱର: ଦୁର୍ଦ୍ଦାନ୍ତ ଅପରାଧି ଚକ୍ରଧର ବାରିକ ଓରଫ ଚକରାଙ୍କୁ ଏନ୍କାଉଣ୍ଟର ବେଳେ ଖସି ପଳାଇଥିବା କଟୁରୀ ଗ୍ୟାଙ୍ଗର ଅନ୍ୟ ଜଣେ ସଦସ୍ୟ କୋର୍ଟରେ ଆତ୍ମର୍ପଣ କରିଛନ୍ତି । ସେ ହେଲେ କ୍ୟାପିଟାଲ ଥାନା ଅନ୍ତର୍ଗତ ପିଚୁକୋଳି ବସ୍ତିରେ ରହୁଥିବା ଘର ନୟାଗଡ଼ ଜିଲାର ରାଜେଶ ମପାପାତ୍ର । ଆତ୍ମସନର୍ପଣ କରିବା ପରେ କୋର୍ଟ ତାଙ୍କୁ ଜେଲ ହାଜତକୁ ପଠାଇ ଦେଇଛନ୍ତି । ତାଙ୍କ ମା’ ଜୋତ୍ସାରାଣୀଙ୍କ ସମେତ ଗ୍ୟାଙ୍ଗର ୮ ଜଣଙ୍କୁ ଗିରଫ କରି ଖଣ୍ଡଗିରି ଥାନା ପୋଲିସ ଜେଲ ପଠାଇଛି । ରାଜେଶଙ୍କୁ ରିମାଣ୍ଡରେ ଅଣାଯାଇପାରେ ବୋଲି ପୋଲିସ କହିଛି । ଦୁର୍ଦ୍ଦାନ୍ତ ଅପରାଧି ରାଜେଙ୍କ ନାମରେ ରାଜଧାନୀର ବିଭିନ୍ନ ଥାନାରେ ୨୦ରୁ ଅଧିକ ମାମଲା ରହିଛି ।
କଟୁରୀ ଗ୍ୟାଙ୍ଗର ମୁଖ୍ୟ ପ୍ରକାଶଙ୍କ ସମେତ ୩ ଜଣ ଫେରାରଥିବାରୁ ପୋଲିସ ତାଙ୍କୁ ଧରିବାକୁ ଛାନଭିନ୍ ଜାରି ରଖିଛି । ସୂଚନା ଅନୁଯାୟୀ, କଟୁରି ଗ୍ୟାଙ୍ଗର ସଦସ୍ୟଙ୍କୁ ଧରିବାକୁ ଗତ ୧୧ ତାରିଖ ବିଳମ୍ବିତ ରାତିରେ ପୋଲିସ ଟିମ୍ ବରମୁଣ୍ଡା ଖେଳପଡ଼ିଆରେ ଚଢ଼ାଉ କରିଥିଲା । ପୋଲିସ ଉପରକୁ ଗ୍ୟାଙ୍ଗ୍ ସଦସ୍ୟମାନେ ବୋମା ଓ ଗୁଳି ମାଡ଼ କରିଥିଲେ । ବୋମାମାଡରେ ୨ଜଣ ପୋଲିସ କର୍ମଚାରୀ ଆହତ ହୋଇଥିଲେ । ପୋଲିସର ପାଲଟା ଗୁଳିରେ ଚକରା ମଧ୍ୟ ଆହତ ହୋଇଥିବାବେଳେ ରାଜେଶ ଓ ଅନ୍ୟମାନେ ଖସି ପଳାଇଥିଲେ। ଶନିବାରଠାରୁ ଚକରାଙ୍କୁ ୫ ଦିନିଆ ରିମାଣ୍ଡରେ ଅଣାଯାଇ ଜେରା କରିବା ପରେ ବୁଧବାର ପୁଣି ଜେଲ ହାଜତକୁ ପଠାଇ ଦିଆଯାଇଛି । ସବୁଠୁ ବଡ଼ କଥା ହେଉଛି ପୂର୍ବରୁ କମିଶନରେଟ ପୋଲିସର ଏକ ଟିମ୍ ରାଜେଶଙ୍କ ପିଚୁକୋଳି ବସ୍ତିରେ ମଧ୍ୟ ଏପ୍ରିଲ୍ ୧୪ରେ ଚଢ଼ଉ କରଥିଲା ।
ହେଲେ ପୋଲିସ ପହ ିବା ପୂର୍ବରୁ ରାଜେଶ ଓ ତାଙ୍କ ପରିବାର ଲୋକ ଘର ଛାଡ଼ି ଖସି ପଳାଇଥିଲେ । ପୋଲିସ ପଛପଟ କବାଟ ଖୋଲି ଘରେ ପସିଥିଲା । ପୋଲିସ ତାଙ୍କ ଘରର ଆଜବେଷ୍ଟସ ଭାଙ୍ଗିବା ସହ ସବୁଆଡ଼େ ଖୋଜା ଖୋଜି କରିଥିଲା । ଶେଷେ ପୋଲିସ ଟିମ୍ ତାଙ୍କ ଘରୁ ଖେଳନା ବନ୍ଧୁକ, ଖଣ୍ଡା, ଭୁଜାଲି, ଚାପଡ଼ ଆଦି ମାରଣାସ୍ତ୍ର ଆଦି ଜବତ କରି ଫେରିଥିଲା । ସେହିଦିନଠୁ କମିଶନରେଟ ପୋଲିସ ତାଙ୍କୁ ଧରିବାକୁ ଖୋଜାଖୋଜି ଜାରି ରଖିଥିଲା । ହେଲେ ସେ ଚକରାଙ୍କ ଓ ଅନ୍ୟମାନଙ୍କ ସହ ମିଶି ଆତଙ୍କ ଖେଳାଉଥିଲେ ।
