ଛାତ୍ରୀଙ୍କୁ ଅସଦାଚରଣ କରି ପ୍ରଧାନଶିକ୍ଷକ ଗିରଫ

ତେଲକୋଇ: ବିଦ୍ୟାଳୟର ଛାତ୍ରୀଙ୍କୁ ବାରମ୍ବାର ଅସଦାଚରଣ କରୁଥିଲେ ପ୍ରଧାନ ଶିକ୍ଷକ । ବିରୋଧ କଲେ ଶ୍ରେଣୀଗୃହରେ ଦେଉଥିଲେ ଅପମାନ । ଅନ୍ୟ ଶିକ୍ଷକଙ୍କ ଗୋଚରେ ଘଟୁଥିଲା ଏପରି ଘୃଣ୍ୟ କାର୍ଯ୍ୟ । ଅସହ୍ୟ ହେବାରୁ ଅଭିଭାବକଙ୍କୁ ଜଣାଇଲେ ଛାତ୍ରୀ । ଅଭିଭାବକ ବିଦ୍ୟାଳୟ ଘେରାଉ କରି ପୁଲିସରେ ଅଭିଯୋଗ କରିବା ପରେ ଗିରଫ ହୋଇଛନ୍ତି ଅଭିଯୁକ୍ତ ପ୍ରଧାନ ଶିକ୍ଷକ । ଘଟଣା ଘଟିଛି ତେଲକୋଇ ବ୍ଲକ ଡିମିରିଆ ସିଆରସିସି ଅନ୍ତର୍ଗତ ଡିମିରିଆ ଉଚ୍ଚ ପ୍ରାଥମିକ ବିଦ୍ୟାଳୟରେ । ବିଦ୍ୟାଳୟର ୧୨ ଜଣ ଛାତ୍ରୀଙ୍କୁ ପ୍ରଧାନଶିକ୍ଷକ ନାରାୟଣ ଚନ୍ଦ୍ର ସେନାପତି ଅସଦାଚରଣ କରିଥିବା ଅଭିଯୋଗ ହୋଇଛି । ଘଟଣା ବିଷୟରେ ଜାଣିବା ପରେ ଗ୍ରାମବାସୀ ବିଦ୍ୟାଳୟ ଭିତରେ ସମ୍ପୃକ୍ତ ପ୍ରଧାନଶିକ୍ଷକଙ୍କୁ ଅଟକ ରଖି ପୁଲିସକୁ ଖବର ଦେଇଥିଲେ । ପୁଲିସ ଘଟଣାସ୍ଥଳରେ ପହଞ୍ଚି ଭିଡ଼ ଶାନ୍ତ କରିବା ପରେ ଛାତ୍ରୀମାନଙ୍କୁ ପଚରା ଉଚରା କରିଥିଲେ । ଏ ନେଇ ଲିଖିତ ଅଭିଯୋଗ ପରେ ସମ୍ପୃକ୍ତ ପ୍ରଧାନ ଶିକ୍ଷକଙ୍କୁ ପୁଲିସ ଗିରଫ କରି ଏକ ମାମଲା ରୁଜୁକରି କୋର୍ଟ ଚାଲାଣ କରିଛି । ଏନେଇ ପୂର୍ବରୁ ଛାତ୍ରୀମାନେ ଅନ୍ୟ ଶିକ୍ଷକଶିକ୍ଷୟିତ୍ରୀଙ୍କ ନିକଟରେ ଅଭିଯୋଗ କରିଥିଲେ ମଧ୍ୟ ସେମାନେ ଚୁପ ରହିଥିବା ନେଇ ଅଭିଯୋଗ କରିଛନ୍ତି ଛାତ୍ରୀମାନେ । ଅଭିଯୁକ୍ତ ପ୍ରଧାନଶିକ୍ଷକ ଓଡ଼ିଶା ରତ୍ନ ଓ ସମ୍ପୂର୍ଣ୍ଣା ଶିକ୍ଷା ସମ୍ରାଟ ଭଳି ପୁରସ୍କାରରେ ସମ୍ମାନିତ ହୋଇଛନ୍ତି । ମାତ୍ର ତାଙ୍କର ଏପରି କଳା କାରନାମା ସମସ୍ତ ଶିକ୍ଷକ ସମାଜକୁ କଳଙ୍କିତ କରିଛି ।