ଆଜିଠୁ ୫ ଦିନିଆ ହାଇଦ୍ରାବାଦ ଗସ୍ତରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ

ହାଇଦ୍ରାବାଦ: ରାଷ୍ଟ୍ରପତି ଦ୍ରୌପଦୀ ମୁର୍ମୁ ଆଜିଠୁ ୫ଦିନିଆ ତେଲେଙ୍ଗାନା ରାଜ୍ୟକୁ ଗସ୍ତ କରିବେ । ଏହି ଗସ୍ତ ସମୟରେ ରାଷ୍ଟ୍ରପତି ରାମପ୍ପା ଓ ଭଦ୍ରାଚାଲାମ ମନ୍ଦିରରେ ଭଗବାନଙ୍କୁ ଦର୍ଶନ କରିବା ସହିତ ସ୍ଥାନୀୟ କିଛି କାର୍ଯ୍ୟକ୍ରମରେ ଯୋଗଦେବେ । ଏନେଇ ତେଲେଙ୍ଗାନା ମୁଖ୍ୟ ସଚିବ ସୋମେଶ କୁମାର ରବିବାର ସୂଚନା ଦେଇଛନ୍ତି । ରଙ୍ଗାରେଡ଼ି ଜିଲ୍ଲା କାନ୍ତାଶାନ୍ତି ଭନାମଠାରେ ଶ୍ରୀରାମଚନ୍ଦ୍ର ମିଶନ ପକ୍ଷରୁ ଆୟୋଜିତ ଶ୍ରୀରାମଚନ୍ଦ୍ରଜୀ ମହାରାଜଙ୍କ ବାର୍ଷିକ ଉତ୍ସବ ପାଳିତ ହେବ । ଏହି ଅବସରରେ ‘ହର ଦିଲ ଧ୍ୟାନ, ହର ଦିନ୍ ଧ୍ୟାନ’ ଅଭିଯାନ ର ଉଦଘାଟନୀ ଉତ୍ସବରେ ସୋମବାର ରାଷ୍ଟ୍ରପତି ଅଂଶଗ୍ରହଣ କରିବେ । ରାଷ୍ଟ୍ରପତିଙ୍କ ଏହି ଗସ୍ତକୁ ଦୃଷ୍ଟିରେ ରଖି ରାଜ୍ୟ ସରକାରଙ୍କ ମୁଖ୍ୟ ସଚିବ ସୋମେଶ କୁମାର ଗତକାଲି କିଛି ଅଧିକାରୀଙ୍କ ସହିତ ଏକ ବୈଠକରେ ସାମିଲ ହୋଇଥିଲେ । ଏହି ବୈଠକରେ ‘ରାଷ୍ଟ୍ରପତି ନିଲୟାମ’ଠାରେ ରାଷ୍ଟ୍ରପତିଙ୍କ ରହଣି ବ୍ୟବସ୍ଥା ନେଇ ଆଲୋଚନା କରିଛନ୍ତି । ସୁରକ୍ଷା ବ୍ୟବସ୍ଥାକୁ ନେଇ ମଧ୍ୟ ସିକ୍ୟୁରିଟି ଅଫିସରଙ୍କ ସହିତ ଆଲୋଚନା କରିଛନ୍ତି ମୁଖ୍ୟ ସଚିବ ସୋମେଶ । ଆସନ୍ତାକାଲିଠୁ ଡିସେମ୍ବର ୩୦ ତାରିଖ ପର୍ଯ୍ୟନ୍ତ ଏକ ନିର୍ଦ୍ଦିଷ୍ଟ ରାସ୍ତା ମଧ୍ୟରେ ଯାନବାହନ ଚଳାଚଳ ନେଇ ମଧ୍ୟ ବ୍ୟବସ୍ଥା ହୋଇଛି, ଯାହାଦ୍ବାରା ରାଷ୍ଟ୍ରପତିଙ୍କ ଗସ୍ତ ସମୟରେ ଟ୍ରାଫିକ ବ୍ୟବସ୍ଥାକୁ ନିୟନ୍ତ୍ରଣ କରାଯାଇହେବ ।