ଭୁବନେଶ୍ୱର: ପୁଲିସ ମିତ୍ର ଭାବେ କାର୍ଯ୍ୟ କରୁଥିବା ଯୁବକ ଘରେ ନଥିବାବେଳେ ତାଙ୍କ ପତ୍ନୀଙ୍କୁ ଅଶ୍ଲୀଳ ଭାଷାରେ ଗାଳି ଗୁଲଜ କରିବା ସହ ପୁଲିସ ମିତ୍ରଙ୍କୁ ହତ୍ୟା ଧମକ ଦେବା ଅଭିଯୋଗରେ ଏୟାରପୋର୍ଟ ଥାନା ପୋଲିସ ୫ଜଣଙ୍କୁ ଗିରଫ କରି ଗୁରୁବାର କୋର୍ଟ ଚାଲାଣ କରିଛି । ଗିରଫ ଅଭିଯୁକ୍ତମାନେ ହେଲେ କାର୍ଗିଲ୍ ବସ୍ତି, ମହାବୀର ସାହିରେ ରହୁଥିବା ଗଞ୍ଜାମର ବାଳିଆ ତହଲ୍(୨୨), କଲେଶ୍ୱରର କପୁ ନାଥ ଓରଫ୍ କାଳିଆ ନାଥ(୨୨), ଗଞ୍ଜାମର ଅନୀଲ୍ ବେହେରା(୨୫), ପୁରୀର ବାବୁ ଓରଫ୍ ଅନୁପ୍ ନାରାୟଣ ଭୋଇ(୩୫) ଓ କଣାସର ଶିବ ଓରଫ୍ ସତ୍ୟଶିବ ବେହେରା(୨୪) ।
ସମସ୍ତ ଅଭିଯୁକ୍ତଙ୍କ ଜାମିନ୍ ନାମଞ୍ଜୁର ହୋଇଯିବାରୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି । ସୂଚନା ମୁତାବକ, ଗିରଫ ଅଭିଯୁକ୍ତ ମାନେ ଗଣେଶ ପୂଜା ଭସାଣିରେ କୌଣସି ବୈଧ ଅନୁମତି ବିନା ଡିଜେ ବଜାଇ ଭସାଣି ଶୋଭାଯାତ୍ରା କରି ନେଉଥିଲେ । ଏୟାରପୋର୍ଟ ଥାନା ପୋଲିସ ବିଶେଷ ସୂତ୍ରରୁ ଖବର ପାଇ ଡିଜେ ଗାଡିଟିକୁ ଜବତ କରି ଥାନାକୁ ଆଣିଥିଲେ । ଅଭିଯାଗକାରିଣୀଙ୍କ ସ୍ୱାମି ଜଣେ ପୋଲିସ ମିତ୍ର ଏବଂ ବିଭିନ୍ନ ସମୟରେ ପୋଲିସକୁ କାର୍ଯ୍ୟରେ ସହାୟତା ମଧ୍ୟ କରନ୍ତି । ତେଣୁ ସେ ପୁଲିସକୁ ଖବର ଦେଇଥିବା ସନ୍ଦେହ କରି ସେ ଘରେ ନଥିବା ସମୟରେ ଅଭିଯୁକ୍ତମାନେ ତାଙ୍କ ଘରେ ପଶି ଅଭିଯାଗକାରିଣୀଙ୍କୁ ଅସଭ୍ୟ ଭାଷାରେ ଗାଳିଗୁଲଜ କରିବା ସହିତା ତାଙ୍କୁ ଓ ତାଙ୍କ ସ୍ୱାମିଙ୍କୁ ଧମକ ଦେଇ ସର୍ବସାଧାରଣରେ ତାଙ୍କୁ ଲଜିତ କରାଇଥିଲେ । ଅଭିଯୋଗକାରିଣୀ ଏ ନେଇ ଏୟାରପୋର୍ଟ ଥାନାରେ ଅଭିଯୋଗକାରିବା ପରେ ପୁଲିସ ମାମଲାର ତଦନ୍ତ କରି ଅଭିଯୁକ୍ତ ମାନଙ୍କୁ ଗିରଫ କରିଥିଲା ।
