ଚଣ୍ଡିଗଡ: ଅକାଳୀ ଦଳର ବର୍ଷୀୟାନ ନେତା ତଥା ପଞ୍ଜାବର ପୂର୍ବତନ ମୁଖ୍ୟମନ୍ତ୍ରୀ ପ୍ରକାଶ ସିଂହ ବାଦଲଙ୍କର ମଙ୍ଗଳବାର ମୋହାଲିସ୍ଥିତ ଫୋର୍ଟିସ ହସ୍ପିଟାଲରେ ୯୫ ବର୍ଷ ବୟସରେ ପରଲୋକ ଘଟିଛି । ଗୁରୁବାର ପଞ୍ଜାବର ପୈତୃକ ଗ୍ରାମରେ ବାଦଲଙ୍କର ଶେଷକୃତ୍ୟ ସମ୍ପନ୍ନ ହେବ ବୋଲି ଜଣାପଡିଛି । ବୁଧବାର ସକାଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଚଣ୍ଡିଗଡରେ ପହଞ୍ଚି ବାଦଲଙ୍କ ଶବାଧାରରେ ପୁଷ୍ପମାଲ୍ୟ ଦେଇ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି । ବାଦଲଙ୍କ ପରଲୋକରେ ବ୍ୟକ୍ତିଗତ କ୍ଷତି ଘଟିଥିବା ମୋଦୀ କହିଛନ୍ତି ।
ଭାରତୀୟ ରାଜନୀତିରେ ତାଙ୍କୁ ପିତାମହ ଭୀଷ୍ମ କହିଲେ ଅତ୍ୟୁକ୍ତି ହେବ ନାହିଁ । ତାଙ୍କ ସଂସ୍ପର୍ଶରେ ଆସି ସେ ରାଜନୀତି ବିଷୟରେ ବହୁତ କିଛି ଶିକ୍ଷାଲାଭ କରିଥିବା ମୋଦୀ ସ୍ୱୀକାର କରିଛନ୍ତି । ଏହି ମହାନ ରାଜନେତାଙ୍କ ବିୟୋଗରେ କେନ୍ଦ୍ର ସରକାରଙ୍କ ପକ୍ଷରୁ ଦୁଇଦିନିଆ (ଏପ୍ରିଲ ୨୬ ଓ ୨୭) ରାଷ୍ଟ୍ରୀୟ ଶୋକ ଘୋଷଣା କରାଯାଇଛି । ଏହି ଦୁଇଦିନ ସମସ୍ତ ସରକାରୀ କାର୍ଯ୍ୟାଳୟରେ ଜାତୀୟ ପତାକାକୁ ଅର୍ଦ୍ଧନମିତ ରଖାଯିବ ଏବଂ ସରକାରୀସ୍ତରରେ ସମସ୍ତ ସାଂସ୍କୃତିକ କାର୍ଯ୍ୟକ୍ରମକୁ ସ୍ଥଗିତ ରଖାଯିବ ।
