ସଇଁନ୍ତଲା : ବଲାଙ୍ଗିର ଜିଲ୍ଲା ସଇଁନ୍ତଲା ଥାନା ଅନ୍ତର୍ଗତ ବଡମାଳ ଫାଣ୍ଡିରୁ ୨ଜଣ ଅଟକ ଥିବା ଅଭିଯୁକ୍ତ ଖସିଯିବା ଘଟଣା । ସେମାନଙ୍କୁ ଧରିବା ପାଇଁ ପୁଲିସ ରାତି ସାରା କସରତ୍ କରିଥିଲେ ବି ସେମାନଙ୍କର ଟେର୍ ପାଇପାରି ନାହିଁ । ଏହି ମାମଲାକୁ ଗୁରୁତର ସହ ନେଇ ଦାୟିତ୍ୱରେ ଅବହେଳା କରିଥିବା ୩ଜଣ କନେଷ୍ଟବଳଙ୍କୁ ଆରକ୍ଷୀ ଅଧିକ୍ଷକ(ଏସ୍ପି) ନୀତିନ କୁଶଲକର ନିଲମ୍ବିତ କରିଛନ୍ତି । ଗତକାଲି ରାତିରେ ୨ଜଣ ଅଭିଯୁକ୍ତ ହାତ ଧୋଇବା ବାହାନାରେ ବାହାରକୁ ଆସି ଫେରାର ହୋଇଯାଇଥିଲେ । ଗତ ୧୮ ତାରିଖରେ ସଇଁନ୍ତଲା ଥାନା ବେଲଗାଁ ଫାଣ୍ଡି ଅଞ୍ଚଳରେ ଥିବା ବିନ୍ଧନବାହାଲି ଦେଶୀ ମଦ ଭାଟିରୁ ୮ରୁ ୧୦ଜଣ ଯୁବକ ରାତିରେ ଯାଇଥିଲେ ।
ମଦ ମାଗିବା ବାହାନାରେ ଗଣ୍ଡଗୋଳ କରିବା ସହ ପିସ୍ତଲ ଦେଖାଇ ଭାଟିର ପରିଚାଳକ ପିଣ୍ଟୁ ସିଂ ଓ ବିକ୍ରେତାଙ୍କୁ ମାଡ ମାରିଥିଲେ । ସେମାନଙ୍କଠାରୁ ୨ଟି ମୋବାଇଲ୍ ଫୋନ୍ ଓ ପ୍ରାୟ ଦେଢ ଲକ୍ଷ ଟଙ୍କା ଲୁଟି ନେଇଥିଲେ । ଏ ସଂପର୍କରେ ଭାଟି ପରିଚାଳକ ପିଣ୍ଟୁ ସିଂ ସଇଁନ୍ତଲା ଥାନାରେ ଅଭିଯୋଗ କରିଥିଲେ । ସଇଁନ୍ତଲା ଥାନା ଅଧିକାରୀ ଅବନୀ ସାହୁ, ସାଇଣ୍ଟିଫିକ୍ ଦଳ ଘଟଣାସ୍ଥଳକୁ ଯାଇ ଯାଞ୍ଚ କରିବା ସହ ଆବଶ୍ୟକୀୟ ଦସ୍ତାବେଜ ସଂଗ୍ରହ କରିଥିଲେ । ସଇଁନ୍ତଲା ପୁଲିସ ମାମଲା ରୁଜୁ କରିବା ସହ ତଦନ୍ତ ଚଳାଇଥିଲା ।
୨ ଦିନ ତଳେ ଟଙ୍କା ଓ ମୋବାଇଲ୍ ଲୁଟ୍ ମାମଲାରେ ପୁଲିସ ସର୍ଗିପାଲି ଗାଁର ପିଣ୍ଟୁ ଦାସ ଓ କନ୍ଧମାଳ ତୁମୁଡିବନ୍ଧର ସନ୍ତୋଷ ବଡସେଟକୁ ଧରିଥିଲା ପୁଲିସ । ସେମାନଙ୍କୁ ବଡମାଳ ଫାଣ୍ଡିରେ ରଖି ପଚରାଉଚରା ଚଳାଇଥିଲା । ଅନ୍ୟ କେଉଁମାନେ ଏହି ଘଟଣାରେ ସଂପୃକ୍ତ ଅଛନ୍ତି ସେନେଇ ଜରୋ କରିଥିଲା ପୁଲିସ । ପରେ ରାତିରେ ସେମାନଙ୍କୁ ଖାଇବାକୁ ଦିଆଯାଇଥିଲା । ଖାଇ ସାରିବା ପରେ ହାତ ଧୋଇବା ବାହାନାରେ ବାହାରକୁ ଆସି ଖସିଯାଇଥିଲେ ଅଭିଯୁକ୍ତ । ସେମାନଙ୍କୁ ଜଗିବା ପାଇଁ ଫାଣ୍ଡିର କେହି କର୍ମଚାରୀ ତାଙ୍କ ସାଙ୍ଗରେ ବାହାରକୁ ଆସି ନଥିଲେ । ଦୀର୍ଘ ସମୟ ହୋଇଯାଇଥିଲେ ବି ୨ଜଣ ହାତ ଧୋଇ ନଫେରିବାରୁ ପୁଲିସ ସେମାନଙ୍କୁ ଖୋଜାଖୋଜି କରିଥିଲା ।
