ଘଟଣା ନବୀନ ଆଗରୁ ଜାଣିଛନ୍ତି: ଭର୍ତ୍ତୃହରି

ଭୁବନେଶ୍ୱର: ବୋହୂର ଅଭିଯୋଗ ନେଇ ସାଂସଦ ଭର୍ତ୍ତୃହରି ମହତାବ ପ୍ରତିକ୍ରିୟା ଦେଇ କହିଛନ୍ତି, ଘଟଣା ସଂପର୍କରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଜାଣିଥିଲେ । ନିର୍ବନ୍ଧ ବେଳେ ନବୀନ ଥିଲେ, ରିସେପସନରେ ବି ସେ ଥିଲେ ବୋଲି ଭର୍ତ୍ତୃହରି କହିଛନ୍ତି । ପରିବାରର ବଡ ଭାଇ ଭାବେ ସେ ଏସବୁ କଥା ଜାଣିଥିଲେ । ନିର୍ବାଚନ ହେଲା ୨୦୧୯ରେ । ୨୦୧୮ ଶେଷ ଆଡକୁ ସେ ଜାଣିଥିଲେ । ଯୌତୁକ ଅଭିଯୋଗ କଣ ୪/୫ ବର୍ଷ ପରେ କରାଯାଏ କି ? ମୋ ଜୀବନ ଏକ ଖୋଲାବହି ବୋଲି ସେ କହିଛନ୍ତି । ଜଣେ ବାପା ହିସାବରେ ମୁଁ ଚାହୁଁଥିଲି ସେମାନେ ଏକାଠି ରୁହନ୍ତୁ । କୌଣସି କାରଣରୁ ସେମାନେ ୪/୫ ଦିନ ଏକାଠି ରହିପାରିଲେନି ।
ତେବେ ଭର୍ତ୍ତୃହରି ମହତାବଙ୍କ ପୁଅ ଲୋକରଂଜନ ମହତାବଙ୍କୁ ବିବାହ କରିଥିଲେ ବୋହୂ ସାକ୍ଷୀ । ହେଲେ ଏବେ ସାକ୍ଷୀ ଭୋପାଳ ମହିଳା ଥାନାରେ ଭର୍ତ୍ତୃହରିଙ୍କ ସମେତ ସ୍ୱାମୀ ଓ ଶାଶୁଙ୍କ ନାମରେ ଏତଲା ଦେଇଛନ୍ତି । ୩ ପୃଷ୍ଠାର ଅଭିଯୋଗ ପତ୍ରରେ ସାକ୍ଷୀ ଦର୍ଶାଇଛନ୍ତି , ବିବାହ ସମୟରେ ଯୌତୁକ ବାବଦକୁ ଅଡେଇ କୋଟି ଟଙ୍କା ସୁନା ଗହଣା ସହ ଅନ୍ୟାନ୍ୟ ଡ୍ରେସ ଦିଆଯାଇଥିଲା । ବିବାହର କିଛି ଦିନ ପରେ ଅଧିକ ଯୌତୁକ ଦାବି କରିଥିଲେ ଶାଶୁଘର ଲୋକେ । ତା ସହ ମାନସିକ ଓ ଶାରୀରିକ ନିର୍ଯାତନା ବି ଦେଇଥିଲେ । ଏପରିକି କଟକସ୍ଥିତ ଘରୁ ତାଙ୍କୁ ବାହାର କରି ଦିଆଯାଇଥିବା ନେଇ ସାକ୍ଷୀ ଏତଲାରେ ଦର୍ଶାଇଛନ୍ତି । କେବଳ ଏତିକି ନୁହେଁ ଏସଂପର୍କରେ କୋର୍ଟଙ୍କ ଦ୍ୱାରସ୍ଥ ମଧ୍ୟ ସେ ହୋଇଥିଲେ । କୋର୍ଟ ଭର୍ତ୍ତୃହରିଙ୍କ ନୂଆଦିଲ୍ଲୀସ୍ଥିତ ଘରେ ରହିବାକୁ ଅନୁମତି ଦେଇଥିଲେ । ତଥାପି ଶାଶୁଘର ଲୋକେ ଗ୍ରହଣ କରିନଥିବା ଦର୍ଶାଇ ଭୋପାଳ ମହିଳା ଥାନାରେ ସାକ୍ଷୀ ଏତଲା ଦେଇଛନ୍ତି । ଏତଲା ଆଧାରରେ ୪୯୮-ଏ, ୪୦୬, ୫୦୬ ଓ ଧାରା ୩୪ ଆଧାରରେ ମାମଲା ରୁଜୁ କରିବା ସହ ଖୁବ ଶୀଘ୍ର ମହତାବଙ୍କ ଘରକୁ ନୋଟିସ ପଠାଯିବ ବୋଲି କହିଛି ଭୋପାଳ ପୋଲିସ । ଡିସେମ୍ବର ୧୨, ୨୦୧୬ ନୂଆଦିଲ୍ଲୀରେ ବେଶ ଧୂମଧାମରେ ଓ ପାରମ୍ପରିକ ରୀତିନୀତିରେ ବିବାହ ହୋଇଥିଲା ଭୋପାଳ ନିବାସୀ ସା୭ୀ ଓ ଲୋକରଂଜନଙ୍କର । କିନ୍ତୁ ଆରମ୍ଭରୁ ହିଁ ଉଭୟଙ୍କ ସଂସାର ଠିକରେ ଚାଲିନଥିଲା । ବିବାହର ମାତ୍ର ୪ ଦିନ ପରେ ଅର୍ଥାତ ୨୦୧୬ ଡିସେମ୍ବର ୧୬ ତାରିଖରେ ସାକ୍ଷୀଙ୍କୁ ନେଇଯିବାକୁ ତାଙ୍କ ବାପା ମାଙ୍କୁ ଶାଶୁଘର ଲୋକେ କହିଥିବା ଏତଲାରେ ସାକ୍ଷୀ ଦର୍ଶାଇଛନ୍ତି । ସମାଧାନ ପାଇଁ ବାପା ମା ଉଦ୍ୟମ କରିଥିଲେ ବି ସମାଧାନ ହୋଇନଥିଲା ବୋଲି ସେ ଦର୍ଶାଇଛନ୍ତି । କେବଳ ଏତିକି ନୁହେଁ ଜୀବନରେ ମାରିଦେବାକୁ ବି ଧମକ ଦିଆଯାଇଥିବା ସେ କହିଛନ୍ତି । ତେବେ ପୁଅର ବିବାହ ବିଚ୍ଚେଦ ମାମଲା ୨ ବର୍ଷ ହେବ ଦିଲ୍ଲୀ କୋର୍ଟରେ ବିଚାରଧୀନ ଥିବା ଭର୍ତ୍ତୃହରି ମହତାବ କହିଥିବା ନେଇ ଜାତୀୟ ଗଣମାଧ୍ୟମରେ ଖବର ପ୍ରକାଶ ପାଇଛି ।